Babu Tsuntsu, Babu Tarko: 'Dan Takarar Sanatan Yobe Ta Arewa Ya Ki Janyewa Ahmad Lawan
- Shugaban majalisar dattawa, Ahmad Lawan ya shiga tasku inda ya ke hango yin biyu babu bayan 'dan takarar sanata na Yobe ta Arewa ya yi mirsisi ya ki janyewa
- An gano cewa, makusantan Lawan sun dinga matsantawa Bashir Machina, wanda ya ci zaben fidda gwani na kujerrar da Lawan yake kai, da ya janye
- Bayanai sun nuna cewa, Lawan tare da Salihu, mataimakin shugaban APC na arewa maso gabas, suna kokarin yin karfa-karfa wurin kwace tikitin takarar
Duka biyu kenan ga shugaban majalisar dattawan Najeriya, Sanata Ahmad Lawan. 'Dan takarar kujerar sanata mai wakiltar Yobe ta Arewa a karkashin jam'iyyar APC kuma wanda ya ci zaben fidda gwani, Bashir Machina, ya ki janyewa Lawan.
Lawan, wanda ke wakiltar Yobe ta Arewa a majalisar dattawa, ya sha kaye a hannun Bola Ahmed Tinubu a zaben fidda gwani na neman tikitin takarar shugabancin kasa da aka yi a ranar 8 ga watan Yuni.
Da farko an fara bayyana shugaban majalisar dattawan a matsayin 'dan takarar yarjejeniya na jam'iyyar, amma gwamnoni 13 na arewacin Najeriya sun yi watsi da lamarin inda suka ce ya zama dole a mika mulki kudancin kasar nan.
Asali: UGC
Daily Nigerian ta tattaro cewa, tunda wanda ya yi nasaa a zaben fidda gwani na kujerar sanatan da Lawan ke kai ya ki janyewa, shugaban majalisar dattawan na matsantawa fadar shugaban kasa domin ya samu tikitin kujerarsa.
DUBA: Bibiyemu a Instagram don samun labarai masu muhimmanci kai tsaye cikin manhajar
Duk wani kokarin masoyan Lawan na jan hankalin Machina kan ya janyewa shugaban majalisar dattawan, ya tashi a kawai saboda 'dan takarar ya ce shi fa bai ga ta janyewa ba.
Kamar yadda majiyoyi suka ce, a sirrance aka bai wa Lawan form din INEC a hedkwatar APC domin ya cike, duk da bai mayar da kansa ba domin tantancewa kuma bai shiga zaben fidda gwanin da aka yi ba a garin Gashua na ranar 28 ga watan Mayu.
A zaben fidda gwanin, Machina wanda shi ne 'dan takara daya tilo, ya samu kuri'u 289.
Kamar yadda majiyoyi suka sanar, Lawan tare da hadin bakin mataimakin shugaban APC na arewa maso gabas, Mustapha Salihu, suna kokarin yin karfa-karfa wurin kwace tikitin takara daga Machina.
A yayin da aka tuntubi mataimakin shugaban APC na kasa na yankin arewa maso gabas, ya ce bai taba shiga wani lamarin jam'iyyar ko hukuncinta a Yobe ba.
"Ba na shiga lamarin jam'iyyar a jihohin. Yobe tana da salon ta mabanbanci na zaben fidda gwani, wanda shi ne yarjejeniya.
"Dukkan 'yan takarar da suka siya fom a fadin kasa sun cike fom din janyewa daga takarar, wanda hakan bayani ne na cewa sun amnice da hukuncin sama da su kuma tare da amincewar masu ruwa da tsaki a jihar.
"Ina da sanin cewa, tsarin jam'iyya ne a kasar nan cewa idan 'yan takara suka rasa tikitin shugabancin kasa sai su koma kujerarsu a majalisar dattawa. Kun ga Godswilla Akpabio tuni ya karbe tikitin shi," Salihu yace.
Asali: Legit.ng
