Ana Batun Sojojin Amurka, An Kashe Kasurgumin 'Dan Bindiga da Ya Addabi Jihohi 7 a Najeriya
- Jami'an tsaro sun kai samamen hadin gwiwa kan sansanin wani jagoran dabar yan bindiga, Kachalla Kabiru a jihar Kogi
- Rahotanni sun nuna cewa luguden wutar da dakaru suka yi ta sama da kasa, ta halaka Kabiru da wasu manyan mataimakansa
- Majiyoyi sun ce kafin kashe Kachalla Kabiru, shi ke jagorantar ayyukan garkuwa da mutane da ta'addanci a jihohi har bakwai
Ahmad Yusuf, kwararren edita ne a Legit Hausa da ya shafe tsawon shekaru yana kawo muku rahotannin siyasa, nishadi da al'amuran yau da kullum
Kogi, Nigeria - Jami'an tsaron Najeriya sun yi nasarar kawar da wani kasurgumin dan bindiga, Kachalla Kabiru, wanda ya jima yana addabar mutane a jihohi akalla bakwai.
Wannan nasara na zuwa ne yayin da ake ci gaba da muhawara kan sojojin da kasar Amurka ta turo, wadanda suka zo da nufin tallafawa dakarun Najeriya da horo da fasaha.
Source: Original
An kashe Kachalla Kabiru a jihar Kogi
Leadership ta rahoto cewa dakarun tsaron sun kashe Kachalla Kabiru, tare da wasu manyan mataimakansa a wani samame na haɗin gwiwa da suka kai a Jihar Kogi.
Jami'an da suka hadu suka kai wannan samame sun hada da jami'an ofishin mai ba shugaban kasa shawara kan harkokin tsaro, sojoji da dakarun hukumar DSS.
Majiyoyin tsaro sun bayyana cewa an gudanar da wannan farmaki ne a ranar 13 ga Fabrairu, 2026, bayan makonni na tattara bayanan sirri da sa ido, wanda ya tabbatar da inda Kachalla Kabiru ke ɓoye.
Jami'an tsaro sun farmaki 'yan bindiga
Rahoton The Nation ya nuna cewa harin ya haɗa da luguden wuta ta sama da jiragen yaƙi na rundunar sojojin saman Najeriya suka kai, tare da haɗin gwiwar dakarun ƙasa.
Wata majiya ta ce:
“An kashe Kachalla Kabiru da wasu daga cikin manyan mataimakansa a wani farmaki na haɗin gwiwa ta sama da ƙasa. Harin ya biyo bayan sahihan bayanan sirri da suka tabbatar da kasancewarsa a wurin."
Majiyar ta ƙara da cewa Kabiru yana taka muhimmiyar rawa wajen ɗaukar sababbin mayaƙa, tsara hare-hare da kuma jagorantar ’yan bindiga a jihohin yankin Arewa ta Tsakiya da maƙwabtansu.
Jihohin da Kachalla Kabiru ya addaba a Najeriya
An ce Kabiru ya yi ƙaura ne daga Arewa maso Yamma zuwa Kogi fiye da shekaru 10 da suka gabata, inda ya kafa sansani a dazuka da ƙauyukan kan iyaka.
Daga nan ne ake zargin yana jagorantar ayyukan garkuwa da mutane da ta’addanci a jihohin Kogi, Kwara, Benue, Enugu, Edo, Ekiti da Ondo, kamar yadda The Nation ta ruwaito.
Source: Twitter
Majiyar ta bayyana cewa:
“Kashe Kabiru babbar nasara ce a yaƙi da kungiyoyin ’yan bindiga a yankin Arewa ta Tsakiya, kuma ana sa ran hakan zai kawo cikas ga haɗin kai da shirye-shiryen miyagun laifuffuka a jihohi da dama.”
Sojoji sun kashe kwamandan Boko Haram
A wani rahoton, kun ji cewa Dakarun sojoji na rundunar Operation Hadin Kai (OPHK), sun samu nasara kan 'yan ta'addan Boko Haram a jihar Borno.
Dakarun sojojin sun hallaka wani babban kwamandan Boko Haram mai suna Abou Aisha, wanda ya samu raunin harbin bindiga a wuyansa daga bisani ya mutu.
Sojojin sun kwace kudi kimanin Naira miliyan 37 tare da wasu wayoyin salula da ake zargin suna da alaka da ayyukan ta’addanci a jihar Borno.
Wanda ya tantance Muhammad Malumfashi, babban edita a Legit.ng.
Asali: Legit.ng
