Yadda Buhari Ya Kafa Tarihin zuwa Kasashe 21 a 2016 yayin da Tinubu Ya Je 24 a Mulkinsa
Shugaba Bola Tinubu ya yi tafiye-tafiye ƙasashen waje 10 kacal a 2025, yayin da tsohon shugaban ƙasa, Muhammadu Buhari ya ninka shi a shekara daya.
Abdullahi Abubakar, Editan Legit Hausa ne ta bangaren siyasa, kasuwanci da al'amuran yau da kullum, ya na da gogewar aikin jarida sama da shekaru biyar.
Abuja - Tafiye-tafiye da shugabanni a Najeriya ke yi zuwa kasashen ketare na ci gaba da jawo magana a kasa.
An bayyana cewa Shugaba Bola Ahmed Tinubu ya yi tafiye-tafiye ƙasashen waje 10 a shekarar 2025 wanda ake ganin ya yi yawa.
Source: Facebook
Tarihin da Muhammadu Buhari ya kafa a 2016
Sai dai wani rahoton Ledership ya ce marigayi tsohon shugaban ƙasa Muhammadu Buhari ya yi tafiye-tafye zuwa kasashe 21 a shekarar 2016 kacal.
Bulaguron da ya yi a 2016 ita ce shekarar da ya fi yawan fita ƙasashen waje a tsawon mulkinsa na shekaru takwas.
Wannan kwatancen ya sake tasowa ne a yayin da ake ci gaba da muhawara kan yawan tafiye-tafiyen shugabannin ƙasa, kuɗin da ake kashewa, da kuma amfaninsu.
Wasu kasashe da Tinubu ya ziyarta a 2025
Rahotanni daga fadar shugaban ƙasa sun nuna cewa tafiye-tafiyen Tinubu a 2025 sun bazu ne tsawon watanni takwas, galibi kuma sun shafi taron ƙungiyoyin ƙasa da ƙasa, ziyarar aiki, da tarurrukan jawo hannun jari.
A watan Janairu, Tinubu ya yi tafiye-tafiye uku, ya fara ne da tafiya Ghana domin halartar rantsar da sabon shugaban ƙasar, John Dramani Mahama.
Daga nan ya wuce Hadaddiyar Daular Larabawa (UAE) sannan ya ƙare watan da ziyara zuwa Tanzania, inda ya halarci taron 'Mission 300 Africa Energy Summit' a birnin Dares Salaam.
A watan Fabrairu, Shugaban ya yi tafiya zuwa Faransa a wata ziyara ta aiki mai zaman kansa, kafin ya wuce Habasha domin halartar taron shugabannin ƙasashen Afirka na Kungiyar Tarayyar Afirka (AU) a Addis Ababa.
A watan Afrilu, Tinubu ya sake komawa Turai, inda ya shafe lokaci a Faransa da Birtaniya, yana gudanar da tattaunawa da jami’ai da masu ruwa da tsaki a harkokin siyasa da tattalin arziki.
A watan Mayu, Shugaban ya kai ziyara Italiya, inda ya halarci bikin nadin Paparoma Leo XIV a Vatican, taron da ya samu halartar shugabannin ƙasashe da dama na duniya.
Source: Facebook
Sauran tafiye-tafiye da Tinubu ya yi
A ƙarshen watan Yuni zuwa farkon Yuli, Tinubu ya yi tafiya zuwa Saint Lucia a matsayin ziyarar ƙasa, wacce ita ce ziyara ta farko da shugaban Najeriya ya kai ƙasar Caribbean, kafin daga nan ya wuce Brazil.
A watan Agusta, Shugaban ya tafi Japan domin halartar taron ci gaba ta (TICAD), sannan daga nan ya sake komawa Brazil don tattaunawar zuba jari da jami’an gwamnati da ‘yan kasuwa.
A watan Satumba, Tinubu ya yi hutun aiki na kwanaki 10, wanda ya raba tsakanin Faransa da Birtaniya.
Ziyarar ƙarshe ta Tinubu a 2025 ta gudana ne a watan Disamba, inda ya tafi Turai domin hutun ƙarshen shekara, gabanin taron da aka yi a Abu Dhabi da aka shirya gudanarwa a Janairu 2026.
Bulaguron Tinubu a Janairun 2026
Daily Trust ta ce Shugaba Bola Ahmed Tinubu ya shafe kwanaki 22 a wajen Najeriya a cikin watan Janairun 2026 kaɗai, kamar yadda wani nazari kan tafiye-tafiyensa na ƙasashen waje da aka sanar a hukumance ya nuna.
A cikin wannan lokaci, shugaban ƙasar ya kai ziyara Faransa, Hadaddiyar Daular Larabawa (UAE) da kuma Jamhuriyar Türkiye (Turkiyya).
Jerin kasashen da Tinubu ya je a mulkinsa
Gaba ɗaya, tafiye-tafiyen Tinubu sun ratsa Afirka, Turai, Asiya, Caribbean da Kudancin Amurka, tare da mai da hankali kan diflomasiyyar tattalin arziki, tattaunawar sauyin yanayi, haɗin gwiwar yankuna da hulɗar kasashe.
1. Turkiya
2. Faransa
3. Jamus
4. The Netherlands
5. Birtaniya
6. Vatican
7. Jamhuriyar Benin
8. Chadi
9. Ghana
10. Senegal
11. Guinea
12. Equatorial Guinea
13. Kenya
14. Habasha
15. Afirka ta Kudu
16. Tanzania
17. Saudiyya
18. Qatar
19. UAE
20. Brazil
21. Saint Lucia
22. Amurka
23. Indiya
24. China
Source: Twitter
Tafiye-tafiyen Buhari da suka zama daban
A gefe guda kuma, shekarar 2016 ta kasance shekarar da aka fi samun yawan tafiye-tafiye da wani shugaban Najeriya ya taba yi, inda Muhammadu Buhari ya kai ziyara ƙasashen waje sau 21.
A shekarar, tafiye-tafiyen Buhari sun ratsa kusan dukkan watanni, kuma sun ta’allaka ne kan kalubalen tsaro, durkushewar tattalin arziki, yaƙi da cin hanci da rashawa, da tarurrukan ƙasa da ƙasa.
A watan Janairu 2016, Buhari ya ziyarci Kenya da Jamhuriyar Benin, a Fabrairu kuma ya kai ziyara Faransa, Saudiyya, Qatar da Birtaniya.
Tsakanin Maris da Afrilu, ya tafi Amurka, China da Equatorial Guinea, a watan Mayu, ya koma Birtaniya domin halartar taron yaƙi da cin hanci da rashawa, cewar Punch.
A watan Agusta, Buhari ya sake komawa Kenya sannan ya wuce Chadi don halartar rantsar da shugaban ƙasa, a Satumba, ya halarci taron Majalisar Ɗinkin Duniya (UNGA) a Amurka.
Sauran tafiye-tafiyen sun haɗa da Jamus a Oktoba, Morocco a Nuwamba sannan ya ziyarci Senegal da Gambia a matsayin taron sulhun ECOWAS, kafin ya koma Birtaniya.
Rahoton ya nuna cewa wasu daga cikin tafiye-tafiyen Buhari a 2016 sun shafi jinyar lafiya a London, lamarin da ya taimaka wajen yawaitar adadin tafiyarsa, kamar yadda The Nation ta ruwaito.
Source: Facebook
'Amfanin tafiye-tafiyen ga tattalin arziki'
Wasu na ganin tafiye-tafiyen na da matuƙar muhimmanci wajen jawo zuba jari, ƙarfafa diflomasiyya da haɗin gwiwar tsaro a yankuna, yayin da masu suka ke ci gaba da tambayar kuɗin da ake kashewa da tasirinsu a cikin gida.
Sai dai idan aka duba ƙididdiga kawai, tafiye-tafiyen Buhari 21 a 2016 sun kasance abin da ba kasafai ake gani ba.
Peter Obi ya soki yawan tafiye-tafiyen Tinubu
Kun ji cewa Peter Obi ya soki tafiye-tafiyen da Shugaba Bola Tinubu ke yi zuwa kasashen waje inda ya ce ya kwashe kwanaki akalla 196 a waje.
Tsohon dan takarar shugaban kasa a 2023 ya nuna takaicinsa kan yadda Tinubu ke yawo a kasashen waje alhalin Najeriya na cikin "wani hali".
Ya ce rashin jawabin sabuwar shekara da shiru kan matsalolin tsaro na nuna rashin kishin talakawa da gazawar gwamnatin Tinubu.
Wanda ya tantance Muhammad Malumfashi, babban edita a Legit.ng.
Asali: Legit.ng
