Sauki Ya Samu: Dangote da Wasu 'Yan Kasuwa 2 Sun Sauke Farashin Litar Man Fetur

• Matatar Dangote da manyan dillalan mai sun sauke farashin fetur zuwa N840 bayan danyen man Brent ya faɗi zuwa $62
• Rahoton masana’antu ya nuna cewa raguwar kuɗin tace mai ta sanya wa dillalan Najeriya sauya farashin sayar da fetur
• Wannan na zuwa yayin da kasashen OPEC+ suka tabbatar da dakatar da ƙarin samar da mai a Janairu zuwa Maris na 2026

Sani Hamza, kwararren edita ne a fannin nishadi, al'amuran yau da kullum da kuma siyasa. Sani yana da shekaru sama da biyar a aikin jarida

Legas - Rahotanni sun bayyana cewa wasu manyan 'yan kasuwa a Najeriya, ciki har da matatar Dangote, sun sauke farashin man fetur zuwa N840.

Manyan 'yan kasuwar sun sauke farashin fetur din ne bayan an samu saukin farashin danyen man Brent a kasuwar duniya, wanda gangarsa ta koma $62.

Dangote ya sauke farashin litar fetur

Binciken da jaridar Vanguard ta gudanar ya nuna cewa ragin farashin danyen mai ya jawo ragin kuɗin tacewa, wanda hakan ya sa manyan dillalan fetur suka sauke farashi a tashoshin su.

Kara karanta wannan

"Ya tafi har abada": Dangote ya yi wa 'yan Najeriya sabon albishir

Rahoton ya tabbatar da cewa matatar Dangote, wacce ke da ƙarfin tace ganga 650,000 a rana, ta rage farashin lita zuwa N840.

Baya ga matatar Dangote, manyan kamfanonin da ke dillancin mai, irin su AIPEC da NIPCO suma sun daidaita farashinsu zuwa N840.

Sai dai wasu dillalan man suna ci gaba da sayar da litar fetur din a farashin da ya haura N840:

• Rainoil na sayarwa kan N844.
• Sigmund na sayarwa kan N858.
• Master Energy na sayarwa kan N858.
• Northwest na sayarwa kan N850.

Ya aka yi farashin danyen mai ya faɗi?

Masana sun bayyana cewa wannan sabon farashi ya nuna yadda canjin farashin danyen mai ke shafar tashoshin rarraba man fetur a Najeriya.

Raguwar farashin Brent zuwa $62 ta samo asali ne daga ƙarancin buƙatu da kuma tsoron faduwar farashin makamashi a ƙasashen Turai a lokacin sanyi.

Har ila yau, rahoton Forbes ya nuna cewa kasuwannin duniya sun rage sayen danyen mai saboda yawaitar ajiya da kuma matsalolin tattalin arziki a wasu manyan ƙasashe.

Kara karanta wannan

Farashin kayan abinci ya sake ruguzowa ana shirin bankwana da 2025

Masana sun ce wannan na iya ci gaba muddin samar da danyen mai ya zarce buƙatar kasuwanni.

OPEC+ ta zauna gabanin shiga 2026

A gefe guda, kasashen OPEC da suka hada da Saudiyya, Rasha, Iraki, UAE, Kuwait, Kazakhstan, Algeria da Oman sun gudanar da taro ta intanet a ranar 30 ga Nuwamba 2025 domin duba yanayin kasuwar mai da hasashen farko na shekarar 2026.

A sanarwar bayan taron, ƙungiyar ta tabbatar da matakin da ta ɗauka tun 2 ga Nuwamba 2025 na dakatar da ƙarin samar da mai daga Janairu zuwa Maris 2026, in ji rahoton OPEC.

Sun kuma ambaci yiwuwar dawo da ganga miliyan 1.65 da suka rage a baya idan aka samu bukatar hakan a kasuwar duniya, ko kuma su ƙara rage man idan farashin ya ci gaba da sauka.

Ra'ayin mutane kan rage farashin fetur

Legit Hausa ta ji ta bakin Malam Kabiru Mai Nika da ke Unguwar Dan Mani, Rigasa Kaduna, game da saukin farashin fetur da aka samu daga manyan ƴan kasuwa.

Kara karanta wannan

Rikici a raɗin suna ya yi ajalin matashi a wani Bauchi

Malam Kabir Mai Nika ya ce:

"Wannan ragin da aka ce Dangote ya yi zuwa N840 abin farin ciki ne, amma mu farin cikin namu bai kai har zuci ba isa ba.

"Shi talaka yana gane an samu ragi ne idan ya ga ragin a gidan mai, to a zahiri har yanzu fetur ya haura N955 a wasu gidajen man musamman irin na kananun ƴan kasuwa.

"Tsadar fetur dai ita ke jawo tsadar sufuri da na kayan masarufi, wanda a kan talaka duk wahalar ke karewa. Wasu gidajen man ma da gangan suke rufe wa, sai an fara wahalar man su bude."

Shi kuwa Sabiu Dan Sahu ya bayyana cewa N953 ya sha mai a yau, don haka ba zai ce ragin farashin Dangote ya kawo masa wani sauki kai tsaye ba.

Ya roki Dangote da ya bude nasa gidajen man yana mai cewa:

"Ai shi dai ba zai ce ba shi da kudin bude gidajen mai ba, ya kamata a ce a kowace karamar hukuma yana da gidan mai, ta yadda zai rika sayar da man a farashin defo dinsa."

Kara karanta wannan

Tashin hankali: 'Yan bindiga sun kai mummunan hari garuruwan Fulani 4 a Kaduna

A zantawar mu da Kabir Liman Bukka Ukku, ya ce:

"Ina mika godiya ta musamman ga Alhaji Aliko Dangote da sauran manyan masu defo da suka rage farashin mai zuwa N840. Wannan ya nuna cewa sun yi adalci ta hanyar daidaita farashin da na kasuwa a duniya.

"Yanzu kuma, babban kira ga dukkanin masu gidajen mai a Najeriya su fara rage nasu farashin nan da nan. Bai kamata su ci gaba da siyar da mai a kan farashi mai tsada ba a halin yanzu. Muna son ganin sauƙi ya kai ga talaka ba tare da cin riba fiye da kima ba."

Dangote ya sauke kudin lita zuwa N820

Tun da fari, a farkon Nuwamba, 2025, Legit Hausa ta rahoto cewa, matatar Dangote ta sauke farashin litar fetur daga N877 zuwa N828.

Saukar farashin ya zo ne bayan lokaci da matatar ta dauka bata yi irin wannan sauyin ba domin daidaita farashin cikin gida da yanayin kasuwar duniya.

Kara karanta wannan

Matashi 'dan shekara 17 ya lallaba ya kashe matar makwabcinsu cikin dare a Borno

Majalisar manyan masu kasuwancin makamashi (MEMAN) ta tabbatar da saukar farashin, inda ta ce hakan zai jawo saukar farashi a gidajen mai.

Wanda ya tantance Muhammad Malumfashi, babban edita a Legit.ng.

Asali: Legit.ng