Wahala Ta Tunkaro Ƴan Najeriya, Kamfanin NNPCL Ya Canza Farashin Fetur a Gidajen Mai
- Farashin man fetur ya tashi a gidajen man kamfanin NNPCL da ke jihar Legas da kuma babban birnin tarayya Abuja
- An ruwaito cewa a yau Litinin, 4 ga watan Agusta, 2025, gidajen man NNPCL a Legas sun kara N50 kan kowace litar fetur
- A birnin Abuja kuwa an samu ƙarin N65 kan kowace lita ɗaya ta fetur, inda farashin ya tashi daga N890 zuwa N955
Legit.ng Hausa ta bude tasha a manhajar Whatsapp. Kasance tare da mu don samun rahotanni da dumi-dumi!
Ahmad Yusuf, kwararren edita ne a Legit Hausa da ya shafe tsawon shekaru yana kawo muku rahotannin siyasa, nishadi da al'amuran yau da kullum
FCT Abuja - Yayin da ƴan Najeriya ke fama da matsin tattalin arziki da tsadar rayuwa, an sake ƙara farashin kowace litar man fetur a ƙasar nan.
Kamfanin man fetur na Najeriya (NNPCL ya ƙara farashin kowace lita ɗaya ta man fetur (PMS) zuwa N915 a jihar Lagos da N955 a babban birnin tarayya Abuja.
Source: Getty Images
Jaridar The Cable ta lura da cewa, a ranar Litinin, 4 ga watan Agusta, 2025, gidajen man fetur na kamfanin NNPPL sun canza farashin da suke sayar da lita ga jam'a.
LURA: Shin kana son bamu labari da tattaunawa da marubutanmu? Tuntubemu a info@corp.legit.ng
NNPCL ya ƙara farashin fetur a Legas, Abuja
Gidajen mai mallakin NNPCL sun ƙara farashin kowace lita guda ta fetur daga N865 zuwa N915, wanda ke nuna an samu ƙarin N50 kan kowace lita a jihar Legas.
A rahoton da aka tattara yau Litinin, gidajen man NNPCL da ke Abule Ado, titin Ago Palace Way da ke Okota duk a jihar Legas sun ƙara farashin men feturin.
A babban birnin tarayya Abuja kuwa, gidajen mai na kamfanin NNPCL sun kara farashin litar fetur daga N890 zuwa N955 a kowace lita.
Bayanai sun tabbatar da cewa farashin man ya kai N955 a kowace lita a gidan sayar da fetur na NNPCL da ke titin Kubwa Expressway, Abuja, wanda ke nuna an samu ƙarin N65.
Alƙaluman da hukumar NBS ta fitar
A ranar 31 ga Yuli, Hukumar Kididdiga ta Kasa (NBS) ta bayyana cewa mazauna Jahohin Jigawa, Ondo da Lagos ne suka fi biyan farashi mai tsada na man fetur a watan Yuni, 2025.
A daya bangaren kuma, Jihohin Yobe, Kogi da Imo ne suka fi samun mai a farashi mai rahusa, inda aka sayar da lita ɗaya kan N950.60, N986.67 da N987.86 bi da bi, inji hukumar NBS.
Source: Getty Images
A watan da ya gabata, matatar mai ta Dangote ta rage farashin fetur da take sayar wa ƴan kasuwa a rumbunanta zuwa N820 a kowace lita, mako guda bayan ta rage farashin zuwa N840.
Sai dai a yau Litinin, an wayi gari da ƙarin N50 zuwa N65 a gidajen man NNPCL da ke jihar Legas da kuma Abuja, kamar yadda Punch ta ruwaito.
Shugaban NNPCL na ƙasa ya shiga ofishinsa
A wani rahoton, kun ji cewa shugaban kamfanin man fetur na kasa (NNPCL), Bashir Bayo Ojulari, ya fita aiki a daidai lokacin da ake yaɗa jita-jitar ya yi murabus.
Rahotanni sun nuna cewa Ojulari ya isa ofis dinsa kusan ƙarfe 9:35 na safiyar Litinin, 4 ga watan Agustan 2025, lamarin da ya tabbatar da cewa yana nan a kujerarsa.
A karshen makon da ya gabata ne rahotanni da dama suka bayyana cewa Ojulari ya yi murabus, amma babu wata sanarwa a hukumance har zuwa yau.
Wanda ya tantance Muhammad Malumfashi, babban edita a Legit.ng.
Asali: Legit.ng
