Daga Litinin: Akwai Yiwuwar Ruwan Sama Ya Jawo Ambaliya a Kano da Jihohin Arewa 5
- Hukumar NiMet ta yi hasashen cewa za a samu ruwan sama mai karfi daga Litinin zuwa Laraba a sassa daban-daban na kasar nan
- Wasu jihohin Arewa za su fuskanci ruwa da iska mai karfi, wanda zai iya haddasa ambaliya a Bauchi, Filato da wasu jihohi hudu
- NiMet ta bukaci jihohin da ta lissafa a jerin wadanda za su iya fuskantar ambaliyar ruwan da su dauki matakan kariya tun da wuri
Sani Hamza, kwararren edita ne a fannin nishadi, al'amuran yau da kullum da kuma siyasa. Sani yana da shekaru sama da biyar a aikin jarida
Abuja - Hukumar hasashen yanayi ta Najeriya (NiMet) ta bayyana cewa za a samu ruwan sama da iska mai karfi a sassan kasar nan daga Litinin zuwa Laraba.
NiMet ta kuma nuna fargabar cewa, mamakon ruwan sama da za a samu na iya jawo ambaliyar ruwa a wasu jihohin Arewa shida.
Source: Original
Wannan na kunshe ne a cikin wata sanarwa da hukumar hasashen yanayin ta fitar a ranar Lahadi, 27 ga watan Yulin 2025 a Abuja, inji rahoton TVC News.
LURA: Shin kana son bamu labari da tattaunawa da marubutanmu? Tuntubemu a info@corp.legit.ng
Hasashen yanayi na ranar Litinin
NiMet ta yi hasashen cewa za a samu iska da ruwan sama mai matsakaicin karfi da safe a yankunan Jigawa, Zamfara, Kano, Kaduna, Bauchi, Yobe da Katsina a ranar Litinin.
"Ragowar sassan yankin Arewa za su fuskanci yanayin rana da dan hadari kadan," in ji sanarwar.
NiMet ta kara da cewa za a samu ruwan sama da yammaci zuwa dare a yankunan Jigawa, Zamfara, Kano, Kaduna, Bauchi, Yobe, Katsina, Kebbi, Adamawa da Taraba.
Sai dai ta yi gargadi cewa akwai yiwuwar ambaliyar ruwa a sassan Bauchi, Jigawa, Katsina, Kaduna da Kano a wannan rana ta Litinin.
A yankin Arewa ta Tsakiya, za a samu hadari da safe tare da ruwan sama a wasu sassan Abuja da jihohin Neja, Binuwai, Filato da Nasarawa.
“Daga baya kuma, za a samu ruwan sama a Abuja da jihohin Filato, Nasarawa, Kogi, Binuwai da Neja.”
NiMet ta bayyana cewa akwai yiwar jihar Filato ta fuskanci ambaliyar ruwa a wannan lokaci.
A Kudu, za a fuskanci hadari da safe, sai kuma a samu ruwan sama da yamma a jihohin Ondo, Imo, Abia, Enugu, Ebonyi, Anambra, Edo, Delta, Bayelsa, Rivers, Cross River da Akwa Ibom.
Hasashen yanayin NiMet na ranar Talata
A ranar Talata, za a samu rana da dan hadari a wasu yankunan Arewa da safe, kamar yadda rahoton jaridar Vanguard ya nuna.
Amma NiMet ta ce za a samu hadari da ruwan sama da safiyar a sassan Adamawa, Taraba, Yobe, Kaduna, Bauchi, Gombe, Jigawa, Katsina da Kano.
Da yammacin ranar kuwa, za a samu iska da ruwan sama a Adamawa, Taraba, Jigawa, Kano, Kaduna, Katsina, Sokoto da Kebbi.
A Arewa ta Tsakiya, ruwan sama zai sauka da safe a Abuja da jihohin Neja, Binuwai, Kogi, Filato da Nasarawa, yayin da za a kara samun ruwan sama da yamma a Abuja, Filato, Neja, Kwara, Kogi da Nasarawa.
Kara karanta wannan
Ana sa ran ruwan sama zai sauka a Katsina, Kano da jihohin Arewa 17 ranar Alhamis
A Kudu, hadari zai fara haduwa da safe, inda ake sa ran ruwan sama a Akwa Ibom da Cross River, sai kuma a samu ruwan sama mai karfi daga baya a jihohin Abia, Delta, Rivers, Cross River, Akwa Ibom da Bayelsa.
Source: Original
Hasashen yanayi na ranar Laraba
A ranar Laraba kuwa, za a fuskanci rana da dan hadari a wasu sassan Arewa, amma NiMet ta ce:
“Za a samu hadari mai hade da tsawa tare da ruwan sama da safe a Kaduna, Kebbi, Taraba, Sokoto, Zamfara, Yobe, Jigawa, Kano da Katsina.
"Daga bisani kuma, za a kara samun ruwan sama a Borno, Jigawa, Kaduna, Taraba, Adamawa, Bauchi, Yobe, Gombe, Zamfara da Kebbi."
A Arewa ta tsakiya kuwa, NiMet ta ce za a samu hadari da safiyar Laraba tare da yiwuwar ruwa a Abuja da jihohin Filato, Neja da Nasarawa; sai kuma ruwan sama da yamma a Abuja, Filato, Neja, Binuwai da Nasarawa.
A Kudu, ruwan sama da safe zai zuba a jihohin Ebonyi, Akwa Ibom, Rivers da Cross River, yayin da ake sa ran hadari a sauran jihohin.
Da yamma kuma, za a samu ruwan sama mai karfi a Ebonyi, Abia, Enugu, Imo, Anambra, Delta, Bayelsa, Rivers, Cross River da Akwa Ibom.
NiMet ta gargadi jihohin da ke fuskantar barazanar ambaliya da su sanya matakan gaggawa na kare lafiyar al’umma da dukiyoyinsu.
Ambaliya a jihohin Najeriya a watan Yuli
Tun da fari, mun ruwaito cewa, NiMet ta yi gargaɗi cewa jihohi 20 na cikin haɗarin ambaliyar ruwa a watan Yuli 2025, inda jihar Sokoto take kan gaba.
Kaduna, Zamfara, Yobe da wasu jihohi 16 na daga cikin yankunan da za su iya fuskantar ambaliya a cikin wannan wata na Yulin 2025.
Hukumar hasashen yanayin ta bukaci a tsaftace magudanan ruwa, a guji tuki yayin ruwan sama, tare da kaura daga wuraren da ambaliya ke iya shafawa.
Asali: Legit.ng
