Abubuwa 10 da Ya Kamata Musulmi Ya Yi a Kwanaki 10 na Farkon Zul Hijja

Malaman Musulunci na karfafa al'umma da su dage da ibada a kwanaki 10 a farkon watan Zul Hijja.

Editan Legit Hausa Ibrahim Yusuf yana da gogewar aikin jarida da rubuce-rubucen adabi sama da shekaru hudu, kuma kwararre ne a kawo rahotannin kasuwanci, siyasa da lamuran yau da kullum.

FCT, Abuja - A ranar Talata mai alfarma Sarkin Musulmi ya sanar da cewa ranar Laraba, 28 ga Mayu ne za ta kama 1 ga Zul Hijja a kalandar Musulunci.

Musulunci ya tanadi ayyukan alheri sosai ga al'ummar Musulmai a watan Zul Hijja, musamman a kwanaki 10 na farkon watan.

A wannan rahoton, Legit ta tattaro muku jerin ayyuka guda 10 da ake bukata kowane Musulmi ya aikata kwanaki 10 na farkon watan.

Ayyukan da ake so a yi a watan Zul Hijja

1. Yin azumi a kwanakin 9 na Zul Hijja

Sheikh Salih Al Munajjid ya wallafa a shafinsa na amsa tambayoyi cewa azumi yana ɗaya daga cikin ayyukan da suka fi samun lada a kwanaki 9 na farkon Zul Hijja.

Kara karanta wannan

Ambaliya: Ana tsoron rayuka sama da 50 sun salwanta bayan gano gawarwaki 15 a Neja

Malamin ya ce ana so mutum ya azumci ranar Arafa, 9 ga Zul Hijja ko da ba zai azumci sauran kwanakin ba.

Ya ce wanda ya yi azumin wannan rana, an bayyana cewa Allah SWT zai gafarta masa zunubai na shekara da ta gabata da kuma shekara mai zuwa.

2. Yawaita zikiri a kwanakin Zul Hijja

Malamai sun bayyana cewa zikirin Allah a cikin waɗannan kwanaki yana da lada mai girma, kamar yadda Allah ya yi nuni da haka a cikin suratul Hajji.

Sheikh Al-Munajjid ya ce a zamanin sahabbai, suna fitowa kasuwa suna daga murya da kabbarori a cikin waɗannan kwanaki.

3. Yawaita sallar Nafila a Zul Hijja

Yawaita sallolin nafila yana daga cikin hanyoyin da Musulmi ke ƙara kusantar Allah a cikin kwanaki goma na Zul Hijja.

Sallar dare (tahajjud), sallar walaha, da sauran nafiloli suna ƙara wa Musulmi lada da haske a cikin zuciya.

Manzon Allah (SAW) ya ce:

“Mafi kusanci da bawa zai iya samu da Ubangijinsa shi ne a cikin sujuda.”

Saboda haka, amfani da waɗannan kwanaki wajen ƙara yin sujada da addu’a yana daga cikin kyakkyawan aiki da Allah ke so.

Kara karanta wannan

2027: Sanatoci sun gano dalilin kara karfin Boko Haram da sauran 'yan ta'adda

4. Karatun Alƙur’ani a 10 na farkon watan

Karatun Alƙur’ani yana daga cikin ibadojin da ke ƙarfafa zuciya da ɗaukaka matsayin bawa a wajen Allah.

Rasulullah (SAW) ya ce:

“Wanda ya karanta harafi daya na Alƙur’ani, yana da lada 10.”

A cikin wadandan kwanaki masu albarka, wannan lada yana ƙaruwa. Yana da kyau Musulmi ya amfana da wannan dama ya ƙara karatu da nazarin Alƙur’ani.

5. Sadaka da taimakon mabukata

Malamai sun bayyana cewa sadaka a cikin waɗannan kwanaki na kawo kusanci da Allah kuma tana jawo rahamarsa.

Idan Musulmi ya bayar da abinci ko tufafi ko kuɗi don taimakon mabukata, yana samun lada da albarka a rayuwa.

6. Yin Hajji da Umrah a Zul Hijja

Ga waɗanda suka samu hali da lafiyar jiki, yin Hajji yana daga cikin manyan ibadoji da ke da girman lada.

A watan Zul Hijja al'ummar Musulmi daga fadin duniya suke taruwa a kasar Saudiyya domin gudanar da ibadar Hajji.

Kara karanta wannan

Bayan rufe ofishin PDP, Wike ya fadi babbar matsalar da yake fuskanta a Abuja

7. Ziyartar dangi da sada zumunci

Gyara alaka da ziyarar dangi yana daga cikin kyawawan halaye da Musulunci ya kamata ya ƙarfafa a Zul Hijja.

Wannan lokaci na Zul Hijja yana da kyau a yi amfani da shi wajen farfaɗo da zumunci da sulhu tsakanin ‘yan uwa.

8. Neman gafara da tuba a Zul Hijja

Allah yana buɗe ƙofofin rahama da gafara a waɗannan kwanaki. Yana da kyau Musulmi ya zauna ya tuno da laifukansa, ya nemi gafara da zuciya ɗaya, yana mai nadama a kansu.

Tuba na gaske yana tsarkake zuciya da kawar da laifuffuka. Wannan lokaci yana da muhimmanci ga musulmi wajen sake sabunta alakarsa da Allah ta hanyar tuba da gyara hali.

9. Yin Layya a ranar 10 ga Zul Hijja

Yanka dabbar layya a ranar Idi na daga cikin sunna mai karfi. Wannan aiki yana nuna bin sahun Annabi Ibrahim (AS) wanda ya nuna biyayya ga umarnin Allah.

Kara karanta wannan

Tinubu zai kaddamar da manyan ayyuka a Kano da Legas kafin sallar layya

Idan mutum yana da hali, yana da kyau ya yanka dabba domin samun ladan ibada da kuma ciyar da dangi da mabukata.

10. Yin addu’o’i da roƙon Allah a Zul Hijja

Yin addu’a a cikin kwanakin Zul Hijja yana da muhimmanci. Allah yana karɓar addu’ar bayinsa, musamman a cikin dare da kuma a ranar Arafah.

Ya dace Musulmi ya tsara addu’o’insa da bukatunsa, ya roƙi Allah da tawali’u. Wannan lokaci na daga cikin mafiya dacewa da samun amsa addu'a.

A wani bidiyo da aka wallafa a X, Sheikh Abdallah Usman Gadon kaya ya ja hankalin dukkan Musulmai wajen yin aiki a kwanakin yadda ya kamata.

An zabi limamin Arafa a Saudiyya

A wani rahoton, kun ji cewa Sheikh Saleh bn Abdallah Al-Humaid ne zai jagoranci hudubar Arafa ta 2025.

Kasar Saudiyya ce ta fitar da sanarwar, inda aka bayyana Sheikh Saleh bn Abdallah Al-Humaid a matsayin malami da ya yi fice.

Sheikh Saleh bn Abdallah Al-Humaid zai gabatar da hudubar ne a ranar 9 ga Zul Hijja wa miliyoyin Musulmai a garin Makka.

Wanda ya tantance Muhammad Malumfashi, babban edita a Legit.ng.

Asali: Legit.ng