Rundunar 'Yan Sanda Ta Yi Babban Kamu a Kano, An Bankado Masu Safarar Makamai

• Rundunar ‘yan sandan Najeriya ta gano wata ƙungiya da ke safarar makamai ba bisa ƙa’ida ba a unguwar Dorayi Babba, jihar Kano
• Jami’an tsaro sun cafke Abdul Sadiq, Ahmad Muazu, da Aliyu Sharif, an ƙwato makamai da harsasai da ake zargin an aikata laifi da wasunsu
• Kakakin rundunar 'yan sandan kasa, ACP Olumuyiwa Adejobi ya ce sahihan bayanai daga jama’a ne suka taimaka wajen nasarar samamen
• Sufeto Janar na 'yan sanda, Kayode Egbetokun ya ce rundunar za ta ci gaba da kai samame don hana yaduwar makamai ba bisa ƙa’ida ba

A'isha Ahmad edita ce a sashen Hausa na Legit. Tana da ƙwarewa wajen rubutun labarai da rahotanni tsawon shekaru uku. Ta kware a kawo rahotannin, al'amuran da su ka shafi mata da yara da siyasa.

Jihar Kano – Rundunar 'yan Sandan Najeriya ta gano wata ƙungiyar masu safarar makamai ba bisa ƙa’ida ba da ke da mafaka a jihar Kano.

Kara karanta wannan

Hadimin Tinubu ya yi fallasa, ya tono shirin Sanata Ndume kan jam'iyyar APC

Wannan bincike ya kai ga cafke mutane uku da ake zargi tare da ƙwato bindigu 15 da aka ƙera a gida da kuma harsasai 102.

A cewar wata sanarwa da rundunar ta wallafa a shafinta na Facebook, wadanda aka kama sun hada da Abdul Sadiq mai shekaru 43, Ahmad Muazu mai shekaru 22, da Aliyu Sharif mai shekaru 40.

An cafke masu safarar makamai a Kano

Jaridar Leadership ta ruwaito cewa an kama waɗannan mutanen ne a ranar 10 ga Afrilu a unguwar Dorayi Babba a karamar hukumar Gwale da ke jihar.

Jami’in hulɗa da jama’a na rundunar, ACP Olumuyiwa Adejobi, ya tabbatar da cewa an gudanar da samamen ne bisa sahihan bayanan sirri da suka kai ga gano makaman.

Ya ce:

“An kama waɗanda ake zargi da tarin makamai da ba su da lasisi."

“Masu bincike na ci gaba da kokarin gano inda ake kera makaman da kuma kama sauran masu hannu a lamarin.”

Kara karanta wannan

Yan sanda sun yi ƙarin haske bayan kama wasu mafarauta 4 daga Kano da makamai a Edo

Sauran makaman da aka kama a Kano

Baya ga makaman da aka ƙwato, an kuma samu harsasai shida da aka harba a baya, waɗanda ake kyautata zaton an yi amfani da su wajen aikata laifuka.

Sufeto-Janar na ‘yan Sanda, Kayode Egbetokun, ya yaba da gaggawar da jami’an suka nuna wajen gudanar da aikin da cafke wadanda ake zargi.

Ya sake jaddada kudirin rundunar na dakile yaduwar makamai ba bisa ƙa’ida ba a fadin kasar domin kare rayukan jama'a.

Sufeto-Janar na ‘yan sandan ya tabbatar wa da al’umma cewa ‘yan sanda za su ci gaba da kai samame a kan ƙungiyoyin masu aikata laifi tare da dawo da zaman lafiya a sassan ƙasar nan.

Gwamnatin Kano ta yi martani ga ECOWAS

A wani labarin, mun ruwaito cewa gwamnatin Kano ta bayyana matsayinta kan hukuncin da kotun ECOWAS ta yanke game da dokar batanci ga Annabi Muhammad (SAW) da jihar ta kafa.

Kara karanta wannan

Atiku, El Rufai, Malami da sauran manyan ƴan adawa da suka ziyarci Buhari a Kaduna

A cikin wata sanarwa da Kwamishinan Yaɗa Labarai na jihar, Ibrahim Waiya, ya ce jihar ba za ta amince da wani nau’i na matsin lamba daga kowace kungiya ko ƙasa ba dangane da wannan doka.

Kotun ECOWAS dai ta yanke hukunci cewa wasu sassa na dokar batanci da sauran dokokin laifuffuka a ƙarƙashin tsarin Shari’a na jihar Kano sun saba da ka’idojin kare hakkin ɗan Adam.

Wanda ya tantance Muhammad Malumfashi, babban edita a Legit.ng.

Asali: Legit.ng