'Mun Sha Azaba': Janar Tsiga Ya Magantu, Ya Fadi Dabbobin da Suke Kwana Tare da Su

• Janar Maharazu Tsiga ya bayyana irin wahalar da ya sha a hannun 'yan bindiga bayan shafe watanni kusan biyu a tsare a daji
• Tsohon sojan ya ce an tsare su a cikin daji cike da macizai, kunama, da kuraye inda ta kusa kai musu hari a kan dutse
• 'Yan bindigar sun yi amfani da su a matsayin garkuwa yayin hare-haren sojoji, sun kuma saka bam a inda yake barci
• Tsiga ya gode wa Nuhu Ribadu da hafsan tsaro bisa kubutar da su, yana mai cewa tsaro hakkin kowa ne, ba wai gwamnati kadai ba

Abdullahi Abubakar, Editan Legit Hausa ne ta bangaren siyasa, kasuwanci da al'amuran yau da kullum, ya na da gogewar aikin jarida sama da shekaru biyar.

FCT, Abuja - Tsohon Darakta-Janar na NYSC, Birgediya-Janar Maharazu Tsiga mai (ritaya), ya bayyana irin halin da ya shiga a hannun yan bindiga.

Janar Tsiga ya fadi haka ne bayan shafe kusan wata biyu a hannun 'yan bindiga da suka sace shi a Katsina.

Kara karanta wannan

Janar Tsiga: An ji yadda tsohon shugaban NYSC ya kubuta daga hannun 'yan bindiga

Wahalhalun da Tsiga ya sha a hannun miyagu

Tsiga ya ce sun kasance a wani daji mai girma, cike da dabbobi masu hadari da suka hada da kuraye, cewar Vanguard.

Tsohon sojan ya ce tsira da ransa ba komai ba ne face ikon Allah wanda ya nuna girmansa.

Ya ce:

“An tsare mu tare da dabbobi masu hadari kamar kuraye, macizai, da kunama.

"Kafin a sake ni, wata kura ta fara zagaye mu tana neman abinci, menene abincinta? Mu ne!

“A kullum mu na zaune da macizai da kunama. Abu mafi tsoro shi ne yadda suke amfani da mu a matsayin garkuwa yayin hare-haren sojoji. Sun so jiragen yaki su kashe mu. Amma ikon Allah ya fi karfinsu.

"NSA da CDS sun riga sun fada na gari za su tsira, amma marasa gaskiya za su hallaka a karshe."

Yadda Janar Tsiga ya sha da kyar

Janar Tsiga ya kuma tuna yadda 'yan bindigar suka so halaka shi da bam lokacin da yake hannunsu, cewar Punch.

Kara karanta wannan

Karshen wahala: Janar Tsiga ya sami ƴanci bayan watanni 2 a hannun ƴan bindiga

Ya kara da cewa:

“Wani roka da aka harba bai fashe ba, sun dauke shi sun saka a inda na ke barci. Amma Allah ya kiyaye ni.”

“Sun yi kokarin kutsa kai gidana, amma ba su iya ba, sai suka tafi Kaduna suka tarwatsa gidan da bam.”

A madadin sauran mutum 18 da aka ceto, Tsiga ya gode wa Malam Nuhu Ribadu da hafsan tsaron Najeriya, yana mai cewa:

“Tsaro nauyi ne a kan kowa, kowa ya rika bayar da bayanai masu amfani domin kawo karshen ta'addanci."

Janar Tsiga ya tsira daga hannun yan bindiga

Kun ji cewa Cibiyar yaƙi da ta’addanci ta kasa ta miƙa tsohon shugaban NYSC, Maharazu Tsiga, da wasu mutane 18 da aka ceto ga Nuhu Ribadu a Abuja.

Ana ganin kubutar da mutanen 19 wani ci gaba ne a yaƙi da 'yan bindiga, bayan Janar Tsiga ya shafe kwanaki 56 a hannun masu garkuwa.

Nuhu Ribadu ya jinjinawa jami’an tsaro kan nasarar ceto Tsiga da mutane 18, tare da jaddada aniyar gwamnati na inganta yanayin tsaro.

Wanda ya tantance Muhammad Malumfashi, babban edita a Legit.ng.

Asali: Legit.ng