A karshe, Shugaba Tinubu Ya Yi Maganar Kisan da Aka Yi Wa Ƴan Arewa a Jihar Edo

• Bola Ahmed Tinubu ya yi tir da kisan gillar da aka yi wa matafiya 16 a garin Uromi da ke ƙaramar hukumar Esan ta Arewa maso Gabas a Edo
• Mai girma Tinubu ya umarci ƴan sanda da sauran hukumomin tsaro su gudanar da bincike mai zurfi tare da kama waɗanda suka aikata kisan
• Shugaba Tinubu ya jajantawa iyalan waɗanda lamarin ya shafa kuma ya ba su tabbacin cewa jinin ƴan uwansu ba zai zuba a banza ba

Ahmad Yusuf, kwararren edita ne a Legit Hausa da ya shafe tsawon shekaru yana kawo muku rahotannin siyasa, nishadi da al'amuran yau da kullum

FCT Abuja - Shugaban kasa Bola Ahmed Tinubu ya yi Allah wadai da kisan gillar da aka yi wa wasu mafarauta da ke kan hanyar zuwa Kano a jihar Edo.

An tattaro cewa an kashe mafarautan ƴan Arewa a lokacin da wasu ‘yan sintiri suka tsare su a garin Uromi, karamar hukumar Esan ta Arewa maso Gabas ta jihar Edo.

Kara karanta wannan

"Ba yau aka fara ba," Gwamnatin Kano ta yi zazzafan martani kan kisan ƴan Arewa a Edo

Edo: Shugaba Tinubu ya yi Allah wadai

Bola Tinubu ya yi tir da kisan matafiyan ne a wata sanarwa da mai magana da yawunsa, Bayo Onanuga ya wallafa a shafinsa na X a daren ranar Juma'a, 28 ga watan Maris.

Shugaba Tinubu ya bayyana matukar bakin cikinsa kan wannan danyen aiki da ake zargin mutanen gari sun aikata a jihar Edo.

Tinubu ya buƙaci jami'an tsaro su yi bincike

Ya kuma umarci ‘yan sanda da sauran hukumomin tsaro da su gudanar da bincike mai zurfi da gaggawa don gano wadanda suka aikata wannan ta’asa tare da hukunta su.

Shugaban kasa ya jajanta wa iyalan mamatan, ya na mai tabbatar musu da cewa ba za a bar bata-gari su ci gaba da zubar da jinin bayin Allah ba.

Tinubu ya kuma jaddada cewa dokar kasa ba ta yarda da daukar doka a hannu ba, kuma kowa na da ‘yancin yin rayuwa da tafiye-tafiye a ko’ina cikin Najeriya ba tare da tsangwama ba.

Kara karanta wannan

Sheikh Pantami ya jero hanyoyi 3 da za a kama waɗanda suka kashe yan Arewa a Edo

"Ɗaukar doka a hannu ba shi da matsuguni a Najeriya kuma kowane ɗan ƙasa ya na da ƴancin yin tafiye-tafiya zuwa ko'in ba tare da tsangwama ba," in ji Tinubu.

Shugaban ƙasa ya yabawa gwamnan Edo

Bugu da kari, Tinubu ya jinjinawa Gwamnan Edo, Sanata Monday Okpebholo, da shugabannin al’umma a Uromi bisa yadda suka dauki matakin gaggawa don hana tayar da tarzoma.

Tun farko dai Gwamna Okpebholo ya ba da umarnin gudanar da bincike kan lamarin, kuma rahotanni sun nuna har an kama wasu daga cikin waɗanda suka yi kisan.

Hakan ya sa shugaban kasa ya yabi mai girma gwamna tare da jinjina masa bisa namijin kokarin da ya yi musamnan wajen dakile faruwar tashin hankali bayan lamarin.

Pantami ya ba da mafita kan kisan Edo

A wani rahoton, kun ji cewa tsohon ministan sadarwa, Sheikh Isa Ali Pantami ya ce bidiyon kisan matafiya ya nuna irin rashin imanin waɗanda suka yi aika-aikar.

Farfesa Pantami ya ba hukumonin tsaro shawarin hanyoyin da za su bi wajen kamo masu hannu a kisa ta hanyar amfani da fasahohin zamani.

Wanda ya tantance Muhammad Malumfashi, babban edita a Legit.ng.

Asali: Legit.ng