Gwamna Ya Ji Kukan Ƴar NYSC da Malama Ta Lakadawa Duka a Ilorin, Ya Dauki Mataki

• Gwamnatin Kwara ta rage matsayin malama Fatimoh Nike saboda fada a wajen aiki da kuma lakadawa 'yar NYSC dukan tsiya
• Gwamnatin ta ce za ta tura malamar zuwa wata makaranta tare da ba ta horo kan kyawawan dabi’u domin gyara halayenta
• Gwamna AbdulRahman AbdulRazaq ya yi alkawarin kare martabar NYSC tare da tabbatar da cewa ba za a sake samun irin haka ba

Sani Hamza, kwararren edita ne a fannin nishadi, al'amuran yau da kullum da kuma siyasa. Sani yana da shekaru sama da biyar a aikin jarida

Kwara - Gwamnatin jihar Kwara ta ɗauki mataki kan malamar da aka zarga da cin zarafin wata 'yar NYSC a makarantar sakandare ta GJSS Kulende a Ilorin.

Sanarwar ta fito ne daga kwamishiniyar Ilimi, Hajiya Sa’adatu Modibbo Kawu da shugaban hukumar koyarwa, Mallam Bello Tauheed Abubakar.

Sanarwar da aka wallafa a shafin gwamnatin Kwara na dandalin X ya ce kwamitin binciken lamarin ya samu malama Hajiya Hamzat Fatimoh Nike da aikata laifin.

Kara karanta wannan

Majalisa dattawa ta dakatar da tattauna kudirin haraji, ta kafa kwamitin bincike

An hukunta malama saboda dukan 'yar NYSC

Sanarwar ta ce kwamitin ya kama Malama Fatimoh da aikata laifuffukan da suka shafi yin fada a cikin makarantar yayin da take bakin aikinta.

An kuma same ta da yin maganganun batanci, rashin ladabi da rashin girmama alamar martabar kasa da rigar NYSC ke wakilta.

Bisa ga shawarwarin da kwamitin ya bayar, gwamnatin Kwara ta rage matakin aikin Malama Fatimoh da daraja biyu domin zama hukuncin laifin da ta yi.

Gwamnatin Kwara ta ba hukumar NYSC hakuri

Gwamnatin jihar Kwara ta kuma ce za a tura malamar zuwa wata makaranta daban tare da ba ta horo kan kyawawan dabi’u yayin aikinta.

Sanarwar ta ce gwamnati ta yi nadama kan abin da ya faru tare da tabbatarwa hukumar NYSC cewa hakan ba zai sake faruwa ba.

Yayin da gwamnatin ta ce abin da malamar ta yi ba ya wakiltar mutanen jihar, sanarwar ta ce Gwamna AbdulRahman AbdulRazaq ya yi alkawarin kare martabar hukumar NYSC.

Kara karanta wannan

Sultan da shugaban CAN sun ajiye bambancin addini, sun mika bukata 1 ga Tinubu

An lakadawa 'yar NYSC duka a Kwara

Tun da fari, mun ruwaito cewa hukumar kula da masu bautar kasa ta Allah wadai da wasu malaman sakadanre a jihar Kwara da suka lakadawa wata 'yar NYSC dukan tsiya.

An ce rigima ta kaure lokacin da 'yar bautar kasar ta je makarantar karbar wata takarda, malamai suka yi ikirarin cewa ba ta gaishe da su ba, wanda ya sa suka ci zarafinta.

Muhammad Malumfashi, babban edita a sashen Hausa na Legit ya duba labarin.

Asali: Legit.ng