Kano da Wasu Jihohi 23 da Za Su Amfana da Bashin $500m da Tinubu Ya Karbo

• Akalla jihohi 25 za su amfana da sabon lamunin $500m daga Bankin Duniya domin inganta albarkatun ruwa da makamshi
• Jihohin da za su amfana da wannan rance sun hada da Benuwai, Katsina, Akwa Ibom, Neja, Gombe, Sokoto, Enugu da sauransu
• Lamunin zai inganta tsaron dam, gudanar da albarkatun ruwa da kuma haɓaka tsarin wutar lantarki da noman rani a ƙasar

Sani Hamza, kwararren edita ne a fannin nishadi, al'amuran yau da kullum da kuma siyasa. Sani yana da shekaru sama da biyar a aikin jarida

Abuja - Kimanin jihohi 25 ne za su amfana da sabon rancen $500m daga Bankin Duniya domin inganta albarkatun ruwa ta fuskar noman rani da samar da lantarki.

Gwamnatin Tarayya, ta hannun ma’aikatar albarkatun tuwa da ma’aikatar wutar Lantarki, ta sanya hannu kan yarjejeniyar tare da Bankin Duniya.

Za a bunkasa albarkatun ruwa a jihohi

Jaridar Punch ta ce an sanya hannu kan yarjejeniyar ne a ranar Talata domin aiwatar da shirin "Dorewar wuta da noman rani a Najeriya" wanda zai inganta albarkatun ruwa.

Kara karanta wannan

Sabon mafi karancin albashi: Gwamna Uzodimma zai fara biyan ma'aikata N70,0000

Taron sanya hannun ya samu halartar ministan albarkatun ruwa da tsabtace muhalli, Farfesa Joseph Utsev, da ministan makamashi, Adebayo Adelabu.

An bayyana wannan ci gaba ne a cikin wata sanarwa da Bolaji Tunji, mai ba da shawara na musamman ga ministan makamshi ya fitar.

Jihohin da za su amfana da lamunin

1. Benuwai
2. Katsina
3. Akwa Ibom
4. Neja
5. Gombe
6. Sokoto
7. Enugu
8. Bauchi
9. Cross River
10. Nasarawa
11. Ekiti
12. Kebbi
13. Filato
14. Ebonyi
15. Zamfara
16. Abia
17. Kwara
18. Imo
19. Taraba
20. Kano
21. Delta
22. Osun
23. Jigawa
24. Edo
25. Kogi

Sanarwar ta ce shirin zai inganta tsaron madatsun ruwa, gudanar da albarkatun ruwa da kuma haɓaka tsarin wutar lantarki da noman rani a fadin ƙasar, inji rahoton Guardian.

A jawabin Ministan makamashi, Adebayo Adelabu, ya jaddada mahimmancin hadin gwiwa wajen inganta samar da wutar lantarki da kuma inganta tsaron makamashin Najeriya.

Bankin Duniya ya ba Najeriya rancen $500m

Tun da fari, mun ruwaito cewa kamfanin wutar lantarki na kasa (TCN) ya sanar da cewa Bankin Duniya ya ba Najeriya lamunin dala miliyan 500.

Kara karanta wannan

'Ban saka shi ba': Gwamna ya fusata da katobarar hadiminsa, ya dakatar da shi

Kamfanin TCN ya ce sabon lamunin zai taimaka wajen aiwatar da shirye-shiryen inganta ayyukan kowanne kamfani na rarraba wutar lantarki a kasar.

Muhammad Malumfashi, babban edita a sashen Hausa na Legit ya duba labarin.

Asali: Legit.ng