Shugaba Tinubu Na Shirin Gabatar da Naira Tiriliyan 48 a Matsayin Kasafin Kudin 2025

• Gwamnatin tarayya za ta gabatar da kasafin kudin 2025 da ya kai Naira tiriliyan 47.9, domin inganta tattalin arziki
• Majalisar zartarwa ta tarayya ce ta amince da kasafin kudin a taronta na yau wanda shugaba Bola Tinubu ya jagoranta
• Kasafin kudin ya tanadi sayar da gangar danyen mai a kan $75 tare da burin samar da ganga miliyan 2.06 kullum

Sani Hamza, kwararren edita ne a fannin nishadi, al'amuran yau da kullum da kuma siyasa. Sani yana da shekaru sama da biyar a aikin jarida

Abuja - Gwamnatin Najeriya za ta gabatar da kasafin kudi na 2025 da ya kai Naira tiriliyan 47.9, domin inganta ayyuka da tattalin arzikin kasa.

Ministan tsare-tsaren kasafin kudi da tattalin arziki, Atiku Bagudu, ya bayyana haka bayan taron majalisar zartarwa da Bola Tinubu ya jagoranta.

An fara maganar kasafin kudin 2025

Majalisar ta amince da tsarin samar da kudin da za a kashe daga 2025 zuwa 2027 da kuma yadda za a kashe su a shekaru ukun, inji rahoton Leadership.

Kara karanta wannan

Gwamnatin Tinubu za ta raba tallafin dala miliyan 134

Kasafin ya tsayar da farashin gangar danyen mai a kan $75, wanda zai bada tabbacin daidaituwar kudaden shiga da duk da hawa da saukar farashin man a duniya.

Ana sa ran Najeriya za ta samar da ganga miliyan 2.06 na danyen mai a kowace rana, don kara kudaden shiga na gwamnati daga sayar da man.

Abubuwan da kasafin 2025 zai shafa

Majalisar ta kuma sanya farashin musayar dala da Naira a kan N1,400, domin rage tsadar kayayyaki da tabbatar da darajar Naira a kasuwanni.

Ana sa ran kasafin zai jawo bunkasar tattalin arziki da kashi 6.4%, wanda ake sa ran zai rage rashin ayyukan yi da talauci a kasar baki daya.

Kasafin kudin zai bai wa gwamnati damar zuba jari a ababen more rayuwa da tsaro, tare da shawo kan matsaloli bayan majalisa ta amince da shi.

Kasafin 2024 da shugaba Tinubu ya gabatar

A wani labarin, mun ruwaito cewa kasafin shekarar 2024 da shugaba Bola Tinubu ya shirya gabatarwa ya kai Naira tiriliyan 26.

Kara karanta wannan

An bayyana ɓangarorin da Saudiyya za ta yi haɗaka da Najeriya

Ministan kasafi da tsare-tsaren ƙasa, Atiku Bagudu, ne ya bayyana adadin kuɗin da kasafin 2024 ya ƙunsa bayan karƙare taron majalisar zartarwa (FEC).

Muhammad Malumfashi, babban edita a sashen Hausa na Legit ya duba labarin.

Asali: Legit.ng