El Rufai: Abin da Ya Sa Muka Fito da 'Arewa Tech Fest' Domin Taimakawa Jihohinmu

• Nasir El-Rufai ya fito da shirin Arewa Tech Fest domin ganin yadda zai inganta rayuwar matasan Arewa
• Tsohon gwamnan da mutanensa sun cigaba da aikin da aka fara a lokacin ya na mulkin jihar Kaduna
• Hafiz Bayero wanda ya na cikin manyan yaran Malam El-Rufai shi ne kashin bayan tsarin Arewa Tech Fest

M. Malumfashi ya shafe shekaru ya na kawo labaran Hausa musamman na siyasa, addini, tarihi, wasanni da al’ada

Kaduna - Nasir El-Rufai ya kaddamar da shirin Arewa Tech Fest domin bunkasa harkar fasaha a jihohin da ke Arewacin Najeriya.

Tsohon gwamnan na Kaduna wanda kuma shi ne shugaban Afri-Venture Capital ya assasa shirin ganin yadda aka bar yankin a baya.

Yadda aka haifi Arewa Tech Fest

A wani bidiyo da M. S Ingawa ya wallafa a X, an ji Malam Nasir El-Rufai a Kano ya na amsa tambaya kan dalilin kafa Arewa Tech Fest.

Kara karanta wannan

Ana shirin korar Ministoci, Ministan Tinubu ya nada hadimi, ya gargadi yan kwangila

El-Rufai ya bayyana cewa wani na hannun damansa, Hafiz Bayero ne ya kirkiro shawarar a lokacin shi ya na gwamna a Kaduna.

El-Rufai ya cigaba da Arewa Tech Fest

Bayan baris ofis a 2023, sai ya ga bukatar su cigaba da wannan kokari don haka ya hada kai da manyan abokansa irinsu Jimi Lawal.

Malam El-Rufai ya ba da misalin yadda aka yi wa Arewacin Najeriya nisa a bangaren fasaha duk da dinbin mutanen da ke yankin.

A cewarsa yankin ne yake dauke da kusan 60% na mutanen kasar, mutane miliyan 103.

"An bar Arewa a baya" - El-Rufai

Ya ce ko lokacin da shugaban kamfanin Facebook, Mark Zuckerberg ya zo Najeriya, Legas ya je ba tare da ya kula mutanen Arewa ba.

A karkashin Arewa Tech Fest matasa daga Kaduna da sauran jihohin Arewa za su gabatar da tsarin da suke shi domin su iya samun jari.

Kara karanta wannan

Zargin $49bn: Jonathan ya maidawa Sanusi II martani kan satar kudi a gwamnatinsa

Tsohon ministan na birnin tarayya Abuja ya kara da cewa daga cikin wadanda aka ba jari, akwai wadanda kasuwancinsu ya mike a yau.

Sanannen abu ne cewa kimanin 90% na kasuwancin da ake farawa ba su kai labari, El-Rufai ya ce wadanda suka dace ne ke yin suna.

Matsalar durkushewar Naira a yau

Ana da labari cewa daga lokacin da sabon gwamnan babban bankin ya shiga ofis zuwa yanzu, Naira ta rasa rabin darajarta a kasuwa.

Duk da asusun kudin kasar waje ya na karuwa a karkashin Yemi Cordoso, Naira kara yin kasa ta ke yi, yanzu ta zarce N1700 daga N700.

Asali: Legit.ng