Yadda Tafiye Tafiyen Remi Tinubu Suka Lakume N700m a Cikin Wata 3

• Uwargidan shugaban ƙasa Bola Ahmed Tinubu ta gudanar da tafiye-tafiye zuwa ƙasashe biyar a cikin watanni uku
• Gwamnatin tarayya ta kashe N701m saboda tafiye-tafiyen da Remi Tinubu ta yi zuwa ƙasashen wajen a tsawon wannan lokacin
• Haka kuma, gwamnati ta kashe N314m saboda wasu shirye-shirye guda shida da uwargidan shugaban ƙasan ta gabatar

Editan Legit Hausa Sharif Lawal yana da ƙwarewar shekaru wajen kawo rahotannin siyasa, al'amuran yau da kullum, tsegumi da nishaɗi

FCT, Abuja - Gwamnatin tarayya ta kashe maƙudan kuɗaɗe domin tafiye-tafiyen uwargidan shugaban ƙasa, Remi Tinubu.

A cikin watanni uku gwamnatin tarayya ta kashe kimanin N701m domin ɗaukar nauyin tafiye-tafiyen da Remi Tinubu ta yi zuwa ƙasashe biyar.

Jaridar The Punch ta ce ta gano hakan ne ta amfani da manhajar Govspend, wacce ke bin diddigin yadda gwamnatin tarayya take kashe kuɗaɗe.

Kara karanta wannan

'Yan bindiga sun hallaka jami'an sojoji a wani farmaki a jihar Arewa

Gwamnati ta kashe kuɗi kan Remi Tinubu

Bayanan sun nuna cewa gwamnatin ta biya Naira miliyan 700,707,532 a tsawon watanni uku, saboda tafiye-tafiyen da Remi Tinubu ta yi zuwa ƙasashe biyar, ciki har da ƙasashe biyu na Afirika.

A ranar 17 ga watan Nuwamba, 2023, gwamnati, ta asusun gidan gwamnati ta fitar da kudi N77,659,888 domin siyan dala ($94,314) saboda ziyarar Remi Tinubu zuwa ƙasar Amurka.

A ranar 24 ga watan Fabrairu, 2024, gwamnati, ta asusun gidan gwamnati ta biya N149,794,284 domin siyan dala ($152,831) saboda ziyarar uwargidan shugaban ƙasan zuwa Faransa a ranar 4 ga watan Janairu, 2024.

A ranar 15 ga watan Maris, 2024, gwamnati ta biya N202,386,198 ta asusun gwamnati domin siyan dala ($126,834) saboda tafiyar Remi Tinubu zuwa ƙasar Mozambique a wannan watan.

A wannan ranar kuma, gwamnati ta biya N144,571,785 domin siyan dala ($96,118) saboda ziyarar uwargidan shugaban ƙasan zuwa Addis Ababa a ƙasar Habasha, a ranar 9 ga watan Fabrairu, 2024.

Kara karanta wannan

A ƙarshe Shugaba Tinubu ya faɗi ayyukan da yake yi da kudin tallafin man fetur

Gwamnati, ta hanyar asusun ajiya na gidan gwamnati, ta biya N126,295,377 domin siyan dala ($83,967) saboda tafiyar Remi Tinubu zuwa birnin Landan a wannan watan.

Shirye-shiryen Remi Tinubu sun ci kuɗi

Bugu da ƙari, gwamnati ta kashe jimillar kuɗi N314,231,472 a kan shirye-shirye shida na uwargidan shugaban ƙasan cikin watanni huɗu.

Hakan na nuni da cewa gwamnati ta kashe jimillar kuɗi N1,014,939,004 wajen tafiye-tafiye da shirye-shiryen uwargidan shugaban ƙasa a cikin tsawon watanni bakwai.

Remi Tinubu ta goyi bayan Tinubu

A wani labarin kuma, kun ji cewa uwargidan Shugaba Bola Tinubu, Oluremi Tinubu ta bayana cewa shugaban ƙasanya na duk mai yiwuwa domin inganta Najeriya.

Uwargidan shugaban ƙasan ta ce a kullum ƙoƙarin Tinubu shi ne yadda zai kawo sauyi a ƙasar nan fiye da yadda ta ke a halin yanzu.

Asali: Legit.ng