Zanga Zanga: Malamin Musulunci Ya Yi Addu'ar Kawo Karshen Mulkin Tinubu, Ya Yi Tone Tone

• Malamin addinin Musulunci a jihar Sokoto, Murtala Bello Asada ya caccaki gwamnatin Bola Tinubu da masu kushe zanga-zanga
• Sheikh Asada ya ce ko kadan ba zai taba yin shiru kan abubuwan da suke faruwa ba musamman rashin tsaro a yankin Arewa
• Malamin ya roki Allah ya sa zanga-zanga ta kawo karshen mulkin Tinubu ko kuma a yi juyin mulki a kasar saboda ya fi alheri

Abdullahi Abubakar, Editan Legit Hausa ne ta bangaren siyasa, kasuwanci da al'amuran yau da kullum, ya na da gogewar aikin jarida sama da shekaru uku.

Jihar Sokoto - Fitaccen malamin Musulunci, Malam Murtala Bello Asada ya magantu kan shirin zanga-zanga da ake yi.

Malamin ya ce mutane su na cikin mawuyacin hali musamman a Zamfara da Sokoto da Katsina fiye da matsalar zanga-zanga.

Kara karanta wannan

Gwamnati ta fadi dalilin rokon mazauna Yobe su kauracewa zanga zanga

Zanga-zanga: Murtala Asada ya soki mulkin Tinubu

Murtala Bello Asada ya bayyana haka a cikin wani faifan bidiyo da @deedatAhmadd a shafin X inda ya ce suna rokon Allah ya kawo zanga-zanga.

Ya ce mutanen Arewa su na cikin masifar da ta fi karfin zanga-zanga da ake ta ihu a kai inda ya roki Allah ya kawo mulkin soja.

"Ana zanga-zanga za ta jefa kasa cikin hatsari, wanda ke rayuwa a Zamfara da Sokoto da Katsina ji yake ba da shi ake ba."

"Daman su sun saba da masifar ana zuwa a kama mutane yafi 50 ko 100 a kauyensu, yanzu kididdiga ta nuna akwai dubban mutane hannun 'yan ta'adda."

- Murtala Asada

Murtala Asada ya yi addu'ar juyin mulki

"Mutane da yawa idan aka sako su ba su da amfani ka ce wai zanga-zanga zai jawo fitina? Muna rokon Allah ya sa zanga-zanga ta kawo karshen mulkin Bola Tinubu."

Kara karanta wannan

Zanga zangar adawa da Tinubu: Sheikh Gumi ya karfafi guiwar matasa, ya soki malamai

"Muna rokon Allah ya kawo juyin mulki a Najeriya in yaso gobe a bude kasa ta bakwai a jefa Murtala Bello."

- Murtala Bello Asada

Malamin ya sha alwashin ba zai taba barin wadannan maganganu ba ko mene zai faru da shi sai dai ya faru.

Daurawa ya tsorata da mulkin Tinubu

A wani labarin, kun ji cewa Sheikh Aminu Ibrahim Daurawa ya nuna damuwa kan yadda ake gudanar da mulki a gwamnatin Bola Tinubu.

Daurawa ya ce abubuwan da suke faruwa a gwamnatin sun fara ba shi tsoro yadda ake dakatarwa ko korar masu fadan gaskiya.

Muhammad Malumfashi, babban edita a sashen Hausa na Legit ya duba labarin.

Asali: Legit.ng