'Yan Bindiga Sun Yi Garkuwa da Tsohon Shugaban Kungiyar NLC, an Samu Bayanai
- Rahotanni sun bayyana cewa 'yan bindiga sun yi garkuwa da wani tsohon shugaban kungiyar NLC daga gidansa da ke Kaduna
- An ce 'yan bindigar sun sace Kwamared Takai Agang Shamang tsakanin karfe 7:30 na dare zuwa karfe 8:00 na daren ranar Juma’a
- Daya daga cikin 'ya'yan Kwamared Takai ta ce hukumomi a jihar Kaduna na gudanar da bincike da kokarin ganin an kubutar da shi
Sani Hamza, kwararren edita ne a fannin nishadi, al'amuran yau da kullum da kuma siyasa. Sani yana da shekaru sama da biyar a aikin jarida
Jihar Kaduna - An sace wani dattijo mai shekaru 79, Kwamared Takai Agang Shamang a gidansa da ke Bikini-Tsoraurang, Manchock, karamar hukumar Kaura a jihar Kaduna.
Misis Grace Yohannah Abbin, shugabar cibiyar bayar da agaji ta SARC a Kafancha, wadda daya ce daga cikin ‘ya’yan dattijon, ta tabbatar da faruwar lamarin a safiyar Lahadi.
Asali: Original
'Yan bindiga sun sace dan shekara 79
Jarida Daily Trust ta ruwaito cewa an yi garkuwa da Kwamared Takai ne tsakanin karfe 7:30 na dare zuwa karfe 8:00 na daren ranar Juma’a.
LURA: Shin kana son bamu labari da tattaunawa da marubutanmu? Tuntubemu a info@corp.legit.ng
A cewar Misis Grace, wasu gungun masu garkuwa da mutane ne suka shiga gidan mahaifinta inda suka kama shi da karfin tsiya suka tafi da shi.
An ce Kwamared Shamang, wanda ya yi fice wajen ayyukan agaji da sadaukar da kai ga fafutukar kare 'yancin 'yan kwadago, ya kasance mutum ne da ake mutuntawa.
An ce ya taba rike mukamin shugaban kungiyar kwadago NLC.
Al'umma na fatan dawowar dattijon
Misis Grace ta ce hukumomi a jihar Kaduna na gudanar da bincike kan lamarin, kuma ana ci gaba da kokarin ganin an kubutar da shi, in ji rahoton jaridar Vanguard.
Ta kara da cewa 'yan uwa, abokai, da masu fatan alheri na Kwamared Shamang suna nan suna fatan samun mafita mai kyau da kuma dawowar sa gida lafiya.
Har zuwa wallafa wannan rahoton ba a ji ta bakin kakakin rundunar ’yan sandan Kaduna, Mansir Hassan kan lamarin ba yayin da lambar wayarsa ta ki shiga.
'Yan bindiga sun kashe dan shekara 50
A wani labarin mun ruwaito cewa, 'yan bindiga sun kashe wani mutum mai shekaru 50 da dansa a wani hari da suka kawo masa a gidansa.
Yan bindigar sun kashe Alhaji Bello Danbuba mai shekaru 50 da karamin dansa , Aliyu, a kauyen Gandi dake a karamar hukumar Rabah jihar Sokoto.
Asali: Legit.ng
