Hajji 2024: Wani Alhaji Daga Najeriya Ya Sake Rasuwa a Makkah

• Allah ya yiwa wani Alhaji da ya fito daga jihar Kebbi rasuwa a birnin Makkah yayin gudanar da aikin Hajjin bana na shekarar 2024 a ƙasa mai tsarki
• Hukumar jin dadin Alhazan jihar wacce ta tabbatar da rasuwar Alhajin a cikin wata sanarwa ta ce ya fito ne daga Gulma cikin ƙaramar hukumar Argungu ta jihar
• Shugaban hukumar a cikin sanarwar ya bayyana cewa marigayin ya rasu ne bayan ƴar gajeruwar lafiya kuma tuni aka yi jana'izarsa kamar yadda addinin Musulunci ya tanada

Editan Legit Hausa Sharif Lawal yana da ƙwarewar shekaru wajen kawo rahotannin siyasa, al'amuran yau da kullum, tsegumi da nishaɗi

Saudiyya - Hukumar jin daɗin Alhazai ta jihar Kebbi ta sanar da rasuwar wani Alhaji a birnin Makkah na ƙasar Saudiyya.

Tawagar masu yaɗa labaran aikin Hajjin 2024 na jihar Kebbi suka bayyana hakan a cikin wata sanarwa a ranar Lahadi.

Kara karanta wannan

InnalilLahi: Wata Hajiya daga Najeriya ta hallaka kanta a Madina, Saudiyya ta yi martani

Alhaji daga Kebbi ya rasu a Makkah

Sanarwar ta ruwaito shugaban hukumar Alhaji Faruku Aliyu-Enabo yana tabbatar da rasuwar a birnin Makkah ranar Lahadi, cewar rahoton jaridar The Punch.

Alhaji Faruku Aliyu-Enabo, wanda ya bayyana sunan marigayin a matsayin Abubakar Abdullahi daga Gulma a ƙaramar hukumar Argungu ta jihar, ya ce marigayin ya rasu ne bayan gajeruwar rashin lafiya.

Marigayin shi ne na uku daga cikin Alhazan jihar Kebbi da suka rasu yayin gudanar da aikin Hajjin bana a Saudiyya, rahoton jaridar PM News ya tabbatar.

Gwamna ya yi ta'aziyyar rasa Alhaji

Faruku Aliyu-Enabo ya ce Gwamna Nasir Idris ya bayyana kaɗuwarsa da rasuwar, inda ya kuma yi addu’ar Allah ya gafarta masa kurakuransa, ya sanya shi a Aljannatul Firdaus.

Ya ƙara da cewa gwamnan ya kuma buƙaci iyalan mamacin, abokansa da Alhazan jihar Kebbi da su yi haƙuri tare da ɗaukar dangana bisa wannan rashin da aka yi.

Kara karanta wannan

Gwamnatin Kano ta yiwa Alhazan jihar babban gata a Saudiyya

Shugaban ya bayyana cewa tuni aka yi jana’izar marigayin kamar yadda addinin Musulunci ya tanada bayan sallar jana’izarsa a masallacin Harami (Ka’aba) a ranar Juma’a.

Wata Hajiya ta rasu a Saudiyya

A wani labarin kuma, kun ji cewa wata Hajiya daga jihar Neja mai suna Ramatu Abubakar ta riga mu gidan gaskiya a ƙasa mai tsarki.

Hajiyar mai suna Ramatu Abubakar mai shekara 45 a duniya ta rasu ne a birnin Madina bayan ta kamu da rashin lafiya daga isarsu ƙasar Saudiyya.

Muhammad Malumfashi, babban edita a sashen Hausa na Legit ya duba labarin.

Asali: Legit.ng