Sarautar Kano: Kotu Ta Yi Hukunci, An Umarci Aminu Bayero Ya Bar Fadar Nasarawa

• A yayin da rigimar masarautar Kano ta kasa lafawa, kotu ta dakatar da Aminu Ado Bayero daga gabatar da kansa a matsayin Sarki
• An ruwaito cewa kotun ta kuma umarci ‘yan sanda da su kori Aminu Bayero daga gidan sarautar Nassarawa inda ya ke zaman fada
• Wannan dai na zuwa ne bayan da wata babbar kotun tarayya ta ba gwamnatin Kano umarnin dakatar da aiwatar da dokar rusa masarautu

Sani Hamza, kwararren edita ne a fannin nishadi, al'amuran yau da kullum da kuma siyasa. Sani yana da shekaru sama da biyar a aikin jarida

Jihar Kano - Wata babbar kotun jihar Kano karkashin jagorancin Mai shari’a Amina Aliyu ta dakatar da hambararrun sarakunan Kano biyar daga bayyana kansu a matsayin sarakuna.

Haka zalika an ruwaito cewa kotun ta kuma umarci ‘yan sanda da su kori Sarkin Kano na 15, Aminu Bayero daga gidan sarautar Nassarawa.

Kara karanta wannan

Gwamnatin Kano ta tona waɗanda suka shirya zanga zanga kan rusa masarauta

An tabbatar da hakan ne a wani sako da shahararren dan jarida kuma mawallafin jaridar Daily Nigerian, Jaafar Jaafar ya fitar a shafinsa na Facebook.

Kotu ta dakatar da nada sarkin Kano

Wannan ya biyo bayan umarnin da wata babbar kotun tarayya ta bayar na dakatar da gwamnatin jihar daga rusa masarautun da tsohon gwamna Abdullahi Ganduja ya kirkiro.

Kotun ta kuma dakatar da Abba Yusuf daga nada wani sabon sarki a Kano har sai ta yanke hukuncin karshe kan karar da aka shigar gabanta.

Mai shari’a Mohammed Liman ya bayar da wannan umarni ne a cikin karar da Sarkin Dawaki Babba na masarautar Kano, Alhaji Aminu Babba Dan Agundi ya shigar.

An ba sarakunan umarnin barin fada

Idan dai za a iya tunawa, Gwamna Abba Yusuf ya amince da dokar Masarautar Kano da majalisar dokokin jihar ta yi wa kwaskwarima tare da sanar da maido da Sanusi II a matsayin sabon sarki.

Kara karanta wannan

Gwamnatin Kano ta tabbatar da karbar umurnin kotu kan sauke Aminu Ado Bayero

Sabuwar dokar ta soke dokar shekarar 2019 da tsohon gwamnan jihar Abdullahi Ganduje ya sanya wa hannu wadda ta kafa masarautu biyar a jihar.

Gwamnan jihar ya kuma umarci sarakunan da aka tsige da su fice daga gidajen sarautar cikin sa’o’i 48 tare da mayar da kadarorin gwamnati da ke hannun su.

Aminu Bayero ya koma fadar Nasarawa

Sai dai yayin da wasu sarakunan suka yi biyayya, Aminu Ado Bayero ya ki amincewa da umarnin, inda ya dogara da cewa kotu ta dakatar da batun tsige shi.

Lamarin dai ya haifar da zanga-zanga a ranar Lahadi inda aka ga magoya bayan Aminu Bayero suna neman gwamnati ta bi umarnin kotu.

Ko a yau Litinin, mun ruwaito cewa Aminu Ado Bayero ya yi zama a fadar Nassarawa yayin da Muhammadu Sanusi ya gudanar da na sa zaman a fadar Kano.

Kara karanta wannan

"Na karbi kaddara": Sarkin Gaya ya yi magana bayan gwamnatin Kano ta tube rawaninsa

An gudanar da Sallar Al-Qunut a Kano

A wani labarin, mun ruwaito cewa magoya bayan sarakunan da gwamnatin Kano ta sauke daga mulki sun gudanar da gangamin taron addu'o'i da Sallar Al-Qunut a Kano.

An ruwaito cewa an gudanar da sallar tare da yin addu'o'i a kusan dukkanin masarautun da abin ya shafa da fatan maido da sarakunan.

Muhammad Malumfashi, babban edita a sashen Hausa na Legit ya duba labarin.

Asali: Legit.ng