Ana Cikin Ɗimuwa Bayan Jirgi Daga Kaduna Zuwa Abuja Ya Carke a Daji, Sojoji Sun Ja Daga

Fasinjoji sun shiga fargaba bayan jirgin kasa daga Kaduna zuwa Abuja ya samu matsala a tsakiyar daji a Jere

Abdullahi Abubakar, Editan Legit Hausa ne a bangaren siyasa, kasuwanci da al'amuran yau da kullum ne, ya na da gogewar aikin jarida sama da shekaru uku.

Jihar Kaduna - An shiga ɗimuwa yayin da jirgin kasa makare da fasinjoji ya kauce hanya a cikin daji ana tsaka da tafiya a jihar Kaduna.

Jirgin da ya dauko fasinjoji daga Kaduna zuwa Abuja ya carke ne a Jere da ke kan hanyar Abuja da safiyar yau Lahadi 26 ga watan Mayu.

Jirgin kasa ya baro Kaduna zuwa Abuja

Jirgin ya baro Kaduna ne da misalin karfe 8:05 na safe zuwa Abuja amma ya samu matsala bayan awa daya da fara tafiya, Daily Trust ta tattaro.

Kara karanta wannan

Tinubu zai kaddamar da jirgin kasan Abuja, ya yi albishir 1 ga yan Najeriya

An girke jami'an tsaro domin gudun abin da ka iya faruwa a cikin dajin musamman harin yan bindiga.

Leadership ta tabbatar cewa a yanzu haka ana kan gyara inda kusan tarago uku ne suka kauce hanya a jikin jirgin yayin da ake tafiya.

Duk da jirgin ya tsaya ne a yanki mai duwatsu, jami'an sojoji da yan sanda sun hallara domin ba da kariya.

Kaduna: Babu wata sanarwa daga hukumar NRC

Har yanzu babu wata sanarwa daga hukumar kula da jiragen kasa ta Najeriya (NRC) kan lamarin da ya faru a yankin Jere da ke jihar Kaduna.

Rahotanni sun tabbatar da cewa injiniyoyi suna kan gyara domin daidaita komai yayin da mutane suke cikin dar-dar kan abin ka iya faruwa a wurin.

Fasinjoji sun shiga fargaban ne ganin yadda jirgin ya ɓaci a tsakanin duwatsu inda suke tunanin komai zai iya faruwa.

Kara karanta wannan

Rundunar sojojin Najeriya ta fatattaki 'yan ta'adda, an kamo miyagu a Abuja da Oyo

Jirgin sama ya kauce hanya a Lagos

A wani labarin, kin ji cewa wani jirgin sama dauke da fasinjoji 52 ya gamu da tsautsayi bayan ya kauce hanya a jihar Lagos.

Jirgin, mallakin Xejet Airlines ya kauce hanya ne tare da fantsama cikin daji a cikin filin jirgin saman Lagos.

Jami'an Hukumar kula da jiragen saman ta FAAN sun yi gaggawar kai dauki wurin domin ceto fasinjoji daga halin da suke cikin.

Asali: Legit.ng