Sabon Tsarin da Gwamnati ta Kawo Ya Jawowa Dangote da Kamfanoni 6 Tafka Asarar N1.7tr a 2023

• A shekarar 2023 darajar kuɗin Najeriya ta yi raga-raga bayan gwamnati ta fito da tsarin da naira za ta nemo haƙiƙanin darajarta da kanta
• Hakan dai ya jawo manyan kamfanoni sun yi asarar maƙudan kuɗaɗe wajen yin canjin kuɗaɗen ƙasashen waje
• Kamfanin Dangote, MTN da wasu manyankamfanoni biyar sun sanar da yin asarar N1.7tr a shekarar da ta gabata

Editan Legit Hausa Sharif Lawal yana da ƙwarewar shekaru wajen kawo rahotannin siyasa, al'amuran yau da kullum, tsegumi da nishaɗi

FCT, Abuja - Dangote, Nestle da MTN tare da wasu kamfanoni huɗu na Najeriya sun tafka asarar N1.7tr saboda faɗuwar darajar naira a shekarar 2023.

Jaridar The Punch ta ce kamfanonin dai sun yi wannan asarar ne a shekarar 2023 saboda matsalolin da suka shafi canjin kuɗaɗen ƙasashen waje.

Kara karanta wannan

Yadda yajin aikin SSANU/NASU ya jawo silar mutuwar wani dalibin jami'a

Wasu kamfanoni suka yi asarar N1.7tr?

Rukunin kamfanonin Dangote a cikin bayanan kuɗaɗensa na shekarar 2023, ya yi asarar N164bn.

Kamfanin ya ce wannan asarar dai ta samu ne galibi saboda ayyukan da yake yi a wasu ƙasashen.

• BUA

Kamfanin BUA, shi ma ya yi asarar N69.9bn. Hakan ya nuna ƙari mai yawa kan asarar da kamfanin ya yi a shekarar 2022 ta N5.5bn.

• Nigerian Breweries

Kamfanin Nigerian Breweries, a cikin rahoton bayanan kuɗaɗensa na shekarar 2023, ya yi asarar N153bn, saɓanin asarar N26.3bn da ya yi a shekarar 2022.

• Nestle

Asarar ta kuma shafi kamfanin Nestle Nigeria. Kamfanin ya ce saboda faɗuwar darajar naira, ya yi asarar N195.bn, a cewar rahoton jaridar Daily Trust.

• MTN

A ɓangaren sadarwa, kamfanin MTN ya yi asarar kuɗaɗen da suka kai N740.4bn.

Kara karanta wannan

Gwamnatin Tinubu ta fallasa sunayen masu daukar nauyin ta'addanci, za ta dauki mataki

Hakan na nufin an samu ƙarin kaso 804% idan aka kwatanta da asarar N81.8bn da kamfanin ya yi a shekarar 2022.

Asarar ta shafi bankuna

A ɓangaren bankuna kuma, FBN Holdings masu bankin First Bank, sun yi asarar da ta wuce N350bn a shekarar 2023.

Kamfanin HoldCo, a cikin watanni uku na ƙarshen shekarar 2023, ya tafka asarar N253.7bn.

A dunƙule kamfanonin bakwai sun yi asarar jimillar kuɗi har N1.7tr saboda faɗuwar darajar naira.

Dangote ya samu riba mai yawa

A wani labarin kuma, kun ji cewa kamfanin simintin Dangote ya samu ribar biliyoyin kudade a ƙarshen shekarar 2023 da ta gabata.

Kamfanin simintin ya sanar da samun riba har naira biliyan 455.58 wanda hakan ke nufin ƙarin kaso 19% idan aka kwatanta da shekarar 2022.

Asali: Legit.ng