Bayanai Sun Fito Yayin da Majalisar Dattawa Ta Shirya Amincewa da Kasafin Kudin 2024
- Majalisar dattawa za ta yi zamanta na yau Asabar 30 ga watan Disamba da karfe 1:00 na rana domin tantance kasafin kuɗin shekarar 2024
- Babban magatakarda na majalisar dattawa, Chinedu Akubueze ne ya sanar da matakin sauya ranar da nufin tabbatar da tsarin kasafin kuɗin na watan Janairu zuwa Disamba na gwamnatin tarayya
- Shugabancin majalisar ya bayyana ƙudirinsa na zartar da kasafin kuɗin shekarar 2024 kafin ƙarshen shekarar 2023 domin tabbatar da wannan tsarin
Editan Legit Hausa Sharif Lawal yana da ƙwarewar shekaru wajen kawo rahotannin siyasa, al'amuran yau da kullum, tsegumi da nishaɗi
FCT, Abuja - Majalisar dattawa za ta fara zama domin tantancewa tare da zartar da kasafin kuɗin 2024 a ranar Asabar, 30 ga watan Disamba, da ƙarfe 1:00 na rana.
Ku tuna cewa tun da farko majalisar dattawan ta ɗage zamanta har zuwa ranar Juma'a, 29 ga Disamba, domin yin nazari da zartar da kasafin kuɗin shekarar 2024.
Asali: Twitter
Sai dai, kuma an mayar da ranar zuwa ranar Asabar 30 ga watan Disamba, kamar yadda wata sanarwa da magatakardar majalisar dattawa, Chinedu Akubueze ya fitar, cewar rahoton The Nation.
LURA: Shin kana son bamu labari da tattaunawa da marubutanmu? Tuntubemu a info@corp.legit.ng
Majalisar dattijawa na son kiyaye tsarin kasafin kuɗin Janairu zuwa Disamba
Legit.ng ta tattaro cewa shugabannin majalisar sun bayyana aniyarsu ta zartar da kasafin kuɗin shekarar 2024 kafin ƙarshen shekarar 2023 domin kiyaye tsarin tsarin kasafin kuɗi na watan Janairu zuwa Disamba na gwamnatin tarayya.
Wani ɓangare na sanarwar da Chinedu ya fitar na cewa:
"Ana sanar da sanatoci cewa zaman majalisar dattawa, wanda aka shirya a ranar Asabar, 30 ga watan Disamba, zai gudana da ƙarfe 1:00 na rana."
Minista Ya Nemi Karin Kasafin Kudi Ga Ma'aikatarsa
A wani labarin kuma, kun ji cewa ministan bunƙasa ma'adanan ƙasa, Dele Alake, ya ce ma'aikatarsa na bukatar Naira biliyan 250 don haƙo ma'adanai amma gwamnati ta ware masa Naira biliyan 24.
Akan bukatar karin Naira biliyan 250, Mr Alake ya ce dole gwamnati ta zama kan gaba wajen hakar ma'adanai, maimakon kyale kamfanoni suna cin karensu ba babbaka a harkar.
Asali: Legit.ng
