Ba a Gama da Matsalar Kano Ba, Budurwa Ta Sake Yin Ajalin Saurayinta Magidanci, Bayanai Sun Fito

• Rundunar ‘yan sanda a jihar Rivers ta kama wata budurwa da zargin hallaka saurayinta har lahira a jihar
• Budurwar wacce ba a bayyana sunanta ba ta caka wa saurayinta mai suna Tony wuka a wuya har ya mutu
• Kakakin rundunar ‘yan sanda a jihar, Grace Iringe-Koko ta tabbatar da faruwar lamarin ga manema labarai

Abdullahi Abubakar, Editan Legit Hausa ne ta bangaren siyasa, kasuwanci da al'amuran yau da kullum, ya na da gogewar aikin jarida sama da shekaru uku.

Jihar Rivers – Wata budurwa ta sake daba wa saurayinta wuka har lahira bayan ‘yar wata hatsaniya a tsakaninsu.

Budurwar wacce ba a bayyana sunanta ba ta caka wa saurayin ne mai suna Tony har lahira a jihar Rivers, Legit ta tattaro.

Mene ya faru tsakaninsu?

Punch ta tattaro cewa Tony ya samu sabani ne da budurwar tasa inda ya mata dukan tsiya yayin da dauki matakin don kare kanta.

Kara karanta wannan

Ana tsaka da shirin Kirsimeti, 'yan bindiga sun sheke gomman mutane a jihar Filato

Wata majiya ya tabbatar da cewa masoyan sun ci gaba da fadan har kan titi ba tare da duba irin raunin da ke jikin saurayin ba.

Har ila yau, Tony ya fadi kasa bayan rasa jini a jikinsa bayan budurwar ta caka masa wukar a wuya, cewar Chronicle.

Daga bisani mutane sun kawo masa dauki inda suka dauke shi zuwa asibiti yayin da ya rasu a kan hanyar zuwa asibitin.

Mene 'yan sanda suka ce?

Majiyar ta kara da cewa Tony wanda daman ya na da aure ya baro matarsa a Enugu bayan sun samu sabani inda ya ke rayuwa da budurwar da ta yi ajalinsa.

Kakakin rundunar ‘yan sanda a jihar, Grace Iringe-Koko ta tabbatar da faruwar lamarin ga manema labarai.

Grace ta ce yanzu haka an fara gudanar da bincike don gano bakin zaren tare da hukunta wacce ake zargi da kisan.

Kara karanta wannan

Gwamnati za ta saki sunayen 'yan Najeriya da za ta ba tallafin N50k a 2024

Ta ce:

“Tabbas lamarin ya faru, wacce ake zargin yanzu haka ta na hannun ‘yan sanda inda ake gudanar da bincike kuma za a hukunta ta idan an kamala binciken.”

Matar aure ta yi ajalin abokin mijinta

A wani labarin, Wata matar aure ta yi ajalin abokin mijinta mai suna Nafi’u a jihar Kano bayan samun wata hatsaniya a tsakaninsu.

Rahotanni sun tabbatar da cewa tuni aka kama matar wacce ake zargi da aikata kisan a Kano.

Asali: Legit.ng