Naira Ta Gama Zabure-zabure a Kasuwa, Ta Koma Gidan Jiya da $1 ta Harba N1120

• Sannu a hankali kuma ana cigaba da rububin kudin kasashen waje a BDC, Dalar Amurka ta cigaba da tashi a kasuwar canjin
• A makon jiya, kudin Najeriya ya kara daraja bayan wani yunkuri da CBN ya yi na biyan tsohon bashin da bankuna su ke bin sa
• Ba a je ko ina ba sai aka ji mutane sun cigaba da sayen kowace Dalar kasar Amurka a kan abin da ya zarce N1, 000 a BDC

Abuja - Kudin Najeriya na Naira ya na cigaba da gangara a sahun kudin duniya, yanzu ana sayen Dala a kan fiye da N1, 000.

Rahoton da The Cable ta fitar a tsakiyar makon nan ya ce sai mutum ya bada N1, 120 kafin ya iya samun duk Dalar Amurka guda.

Fadin da darajar Naira ta yi a ranar Talata ya kai 9.27% ko kuma a ce kudin Najeriyan ya rasa N95 na kimarsa a cikin sa’o’i 24.

Kara karanta wannan

A shirya: Fadar Shugaban Kasa ta fadi mamayar da Tinubu zai yi wa 'yan boye dala

Naira ta fadi a kasuwar BDC

Wasu ‘yan kasuwa da ke harkar canji sun saye Dala a kan N1, 100 sannan su ka saida ta a N1, 120, an ci ribar N20 a duk guda.

‘Yan Bureau De Change (BDC) da aka fi sani da ‘yan canji sun bayyana cewa a halin yanzu ana yawan neman kudin ketaren.

Hakan na zuwa ne bayan Naira ta yi kwararran tashi a kasuwar canji a makon jiya, har ana tunani farkon fadin Dala kenan.

'Yan boye Dala na cin kazamar riba

A makon jiya an yi ta hasashen cewa lokaci ya yi da Naira za ta tashi, ana ba masu boye Dala shawarar saida abin hannunsu.

Kafin a je ko ina kuma sai aka ji labarin ya canza, kudin kasashen wajen da ake da su a kasuwa ba su iya biyan bukatar jama’a ba.

Kara karanta wannan

Barayi sun sacewa Najeriya man fiye da Naira Tiriliyan 4.3 a shekaru 5 Inji NEITI

Dala ta koma N860 a I & E

A kafar I & E na masu kasuwancin kasa da kasa, kudin gidan ya karye da 7.53%, Nairametics ce Naira ta rasa N60.89 a kan $1.

A maimakon N809.02 da aka saida Dala a ranar Litinin, jiya sai da $1 ta koma N869.91, a haka ne aka ji wasu su na yabon bankin CBN.

Bayanan da aka samu daga FMDQ Securities Exchange sun nuna mafi tsadan farashin da aka saida Dala a jiya shi ne a kan N1, 100.

Naira za ta ba masu boye Dala mamaki

Labari ya zo a makon nan cewa Mai ba shugaban kasa shawara kan harkar tattalin arziki ya aikawa masu boye Daloli sakon gargadi.

Nan gaba Dalar Amurka za ta fadi raga-raga, Dr. Tope Fasua ya na ganin $1 sai ta koma kusan N500 saboda tsare-tsaren da za a kawo.

Asali: Legit.ng