Dakarun Sojoji Sun Cafke Masu Safarar Makamai Ga Yan Ta'adda da Kwato Babura 19 a Kaduna

• Dakarun sojojin Najeriya sun samu gagarumar nasarar cafke wasu miyagun mutum biyu masu safarar makamai ga ƴan ta'adda a Kaduna
• Dakarun sojojin sun cafke mutanen ne a yankin Awon na ƙaramar hukumar Kachia ta jihar Kaduna
• Sojojin a wani artabu da ƴan ta'adda sun kuma samu nasarar ƙwato makamai masu yawa da babura 19

Jihar Kaduna - Dakarun runduna ta ɗaya ta sojojin Najeriya dake Kaduna sun kama wasu mutane biyu da ake zargi da safarar makamai ga ƴan ta'adda.

Dakarun sojojin sun kuma samu nasarar ƙwato makamai da babura 16 a a hannun ƴan ta'adda a Kaduna, cewar rahoton Daily Trust.

Muƙaddashin Daraktan hulda da jama'a na rundunar soji ta ɗaya, Laftanal-Kanal Musa Yahaya, ya tabbatar da cafke miyagun a wata sanarwa da ya fitar ranar Laraba a Kaduna, rahoton Vanguard ya tabbatar.

Kara karanta wannan

Yan Bindiga Sun Yi Awon Gaba da Malamar Jami'a a Wani Sabon Hari a Arewacin Najeriya

Yahaya ya bayyana cewa dakarun sojojin sun kama mutum biyu masu haɗa baki da ƴan ta'adda da safarar makamai, a ranar 24 ga watan Oktoba, a yankin Awon, na ƙaramar hukumar Kachia, bayan samun bayanan sirri.

Ya bayyana cewa, an kama masu laifin ne a gidajensu daban-daban da ke kusa da Awon, bisa ga bayanan sirri daga wani da aka kama a baya, wanda ke tsare a hannun sojoji.

Waɗanne irin makamai aka ƙwato a hannunsu?

Mutum biyun da aka kama an samu makamai a hannunsu da suka haɗa da bindiga kirar AK-47 guda ɗaya, bindigu ƙirar gida guda biyu, harsasai guda takwas masu kaurin 9mm.

"An kwato makaman ne daga inda aka binne su tun da farko a harabar gidan masu laifin." A cewarsa.

Yahaya ya kuma bayyana cewa, a wani samame da aka yi a wannan rana, dakarun rundunar a lokacin da suke aikin share fage a yankin Dogon daji-Saulawa a ƙaramar hukumar Birnin Gwari, sun yi artabu da ƴan ta'adda.

Kara karanta wannan

Yan Bindiga Sun Yi Awon Gaba da Mata Mai Shayarwa da Wasu Mutane Masu Yawa a Jihar Arewa

A cewarsa, sojojin sun yi musayar wuta da ƴan ta'addan lamarin da ya tilasta musu tserewa domin tsira da rayuwarsu saboda ƙarfin da sojojin ke da shi.

Kayayyakin da aka kwato sun haɗa da bindiga ƙirar G3, babura 16, bindigogin gida guda biyu da wayar hannu.

Dakarun Sojoji Sun Sheke Yan Ta'adda 52

A wani labarin kuma, dakarun sojojin Najeriya sun samu nasarar halaka miyagun ƴan ta'adda 52 a cikin mako guda.

Dakarun sojojin sun kuma ceto mutum 63 da ƴan ta'adda suka yi garkuwa da su a sassa daban-daban na ƙasar nan.

Asali: Legit.ng