Fetur ya Haura N680 a Gidajen Mai, Farashin Gas da Dala Duk Sun Lula a Kasuwa

• Man fetur ya na cigaba da kara tsada a Najeriya duk da kamfanin NNPCL ya musanta zargin cewa mai ya soma yin karanci
• Daga N620 da gwamnatin tarayya ta yanke a kwanakin baya, wasu ‘yan kasuwan sun harba farashinsu har ya kusa kai N700
• A jihohin Arewa da su ka fi nisa da manyan tashoshin mai, akwai gidajen da litar mai ta kai N680 bayan gas da ya tashi sosai

Abuja - A wasu gidajen mai da ke musamman Arewacin kasar nan, farashin man fetur gaba-gaba kurum yake yi a kowace rana.

A farkon makon nan, rahoton Punch ya tabbatar da cewa akwai wasu gidajen man da ake saida litar fetur kan N685 a halin yanzu.

Farashin da ‘yan kasuwan su ke saida mai ya zarce abin da gwamnati ta kayyade masu, ana tunanin kudin man zai iya kai N720.

Kara karanta wannan

Za a Kawo Karshen Tashin Dala, Ana Sa Ran Shigowar $10bn Nan da ‘Yan Makonni

Man fetur ya tashi sau 2 a wata 2

A Yuli ne NNPCL ya kara kudin lita daga tsakanin N537 da N550 zuwa N617 a jihohin Arewa, sakamakon canjin kudin danyen mai.

Sanarwar ta jawo mutanen jihohin kudancin Najeriya su na sayen fetur a kan N580 zuwa N600, farashi ya danganta da nisan dako.

Ana tsadar fetur a jihohin Arewa

Duk da karin farashin da aka samu a yau, rahoton ya ce akwai karancin man fetur a irinsu Sokoto, kuma lita ta kai N680 zuwa N685.

Yayin da ake saida kowane litar fetur din a kan N615-N620 a gidajen man NNPCL, ‘yan kasuwa sun harba farashinsu a garuruwa.

Legit.ng Hausa ta lura manyan gidajen mai irin A. A Rano da Matrix ne su ke saida man su a kan N620 zuwa N650 a Zariya da Kaduna.

Kara karanta wannan

An Gudu Ba a Tsira Ba: 'Yadda Matatar Man Dangote Za Ta Jawo Tsadar Mai da Wasu Sauye-sauye a 2024', Rahoto

A safiyar Talata, wani ma'aikaci ya shaida mana ya saye litar fetur a kan N640, mu na da labari tun a kwanakin baya farashin ya kai N630.

...kilon gas ya na kara tsada

A wasu gidajen man, farashin ya zarce haka baya ga kukan cewa litarsu ba ta da kyau, idan an yi sa’ar samun man kenan a garuruwan.

Wani mazaunin Kaduna ya fada mana litar fetur ta kai N650 sannan sai mutum ya lale N12, 000 zai cika tulun gas mai cin kilogiram 12.5.

A cewar wani da ya saye gas a tashar A.A Rano a Zariya, an saida masa kilo a N900.

Za a tsaida tashin Dalar Amurka

A makon nan aka zo da labari cewa Gwamnatin Bola Tinubu na kokarin hana Dala cigaba da tashin kullum-yaumin a kasuwar canji.

Ministan tattalin arzikin Najeriya, Wale Edun ya sanar da cewa akwai $10bn na kudin kasar waje da za a samu nan da makonni kadan.

Asali: Legit.ng