Farashin Mai Na Iya Tashin Gwauron Zabi Saboda Faduwar Darajar Naira A Kasuwanni

• An samu karin farashin danyen mai zuwa Dala 94 wanda shi ne mafi tsada a cikin wannan shekara da mu ke ciki
• Wannan tashin farashin danyen man da kuma faduwar darajar Naira ka iya jawo karin farashin man fetur a Najeriya baki daya
• Kungiyar 'yan kasuwan man a Najeriya ta ce wadannan matsaloli biyu ka iya sa su dole su kara farashin man fetur a kasar ganin yadda al'amura su ke

FCT, Abuja - Akwai alamun karin kudin man fetur bayan tashin farashin danyen mai a kasuwar duniya.

Kungiyar dillalan mai a kasar ita ta bayyana haka a jiya Lahadi 17 ga watan Satumba inda ta ce akwai yiyuwar karin kudin mai saboda karyewar darajar Naira.

Meye zai jawo tashin farashin man fetur?

Rahotanni sun tabbatar cewa a yanzu ana siyar da danyen man a kan Dala 94 kan ko wace ganga, Legit ta tattaro.

Kara karanta wannan

Shara ta kare a Kano, Abba Gida-Gida ya dauki ma'aikatan tsaftace birni mutum 4500

Wannan bai rasa nasaba da karyewar farashin Naira a kasuwanni wanda ya tilasta siyar man da tsada a kasar.

Dillalan su ka ce tsadar danyen man da kuma darajar Naira na daga cikin dalilai na karin farashin man fetur da kaso 80.

Nawa ake siyar da danyen mai a duniya?

Wannan farashin danyen man kan Dala 94 a ranar Lahadi 17 ga watan Satumba shi ne mafi tsada a wannan shekara, Daily Post ta tattaro.

An fara siyar da danyen man kan Dala 82 yayin da ya sauko Dala 70 a watan Yuni sai kuma Dala 92 a makon da ya gabata.

A ranar Alhamis 14 ga watan Satumba darajar Naira ta fadi inda ake siyar da ita Naira 950 kan ko wace Dala bayan samun karancinta a kasuwanni.

Kara karanta wannan

Da Dumi-Dumi: Wutar Lantarki A Najeriya Ta Dawo Bayan Shafe Sa'o'i Babu Ita, An Bayyana Dalilin Hakan

NNPC ta yi asarar Dala 46 saboda sata

A wani labarin, kamfanin mai na NNPC a Najeriya ya bayyana irin asarar da ya yi a cikin kankanin lokaci a kasar.

Kamfanin ya bayyana cewa asarar da ya yi ta kai Dala 46 saboda tsananin satar mai din a Najeriya, musamman a jihohi masu arzikin man fetur.

Wannan na zuwa ne yayin da jama'a ke satar mai din a kullum musamman a Kudancin Najeriya da ke da arzikin man fetur.

Asali: Legit.ng