APC Za Ta Maka INEC da NNPP Kotu Kan Sakamakon Zaben Gwamnan Kano

• Jam’iyyar APC a jihar Kano ta ce za ta dauki mataki game da sakamakon zaben gwamnan jihar da ke Arewa maso Yamma
• APC ta ce lauyoyinta su fara tattara hanyoyin da za su shiga kotu don tabbatar da kalubalantar INEC da NNPP
• Kwankwaso ya ce ba zai tsoma baki a harkokin mulkin Abba Gida-Gida ba, ya fadi dalilinsa na fadin haka a siyasarsa

Jihar Kano - Jam’iyyar APC ta umarci lauyoyinta da su kalubalanci dan takarar gwamnan NNPP a jihar Kano, Abba Kabir Yusuf kan ayyana shi a matsayin zababben gwamnan jihar Kano na zaben 18 ga watan Maris.

Wannan na fitowa ne daga bakin kakakin jam’iyyar, Ahmed Aruwa a ranar Asabar 1 Afirilu, 2023, jaridar Vanguard ta ruwaito.

A cewarsa, ayyana zababben gwamnan ya saba da tanadin dokar zabe kamar yadda ya so a dokar Najeriya.

Kara karanta wannan

Akwai Aiki a Gaban NNPP a Kano, APC Za Ta Karbe Nasarar Abba a Zaben Gwamnan 2023

INEC ta saba doka, inji APC

A cewarsa:

“Ayyana wanda ya ci zaben da INEC ta yi ya saba da tanadin dokar da aka rubuta game da zabe.

“Jam’iyyar APC a Kano na kalubalantar INEC, wacce ta ayyana dan takarar gwamnan NNPP a matsayin wanda ya lashe zabe.

“Abin da INEC ta yi ya saba tanadin dokar zabe ta hanyar ayyana Abba Gida-Gida kamar yadda ya shahara da zababben gwamnan jihar Kano.”

Gawuna ya taya Gida-Gida murnar lashe zabe

Saboda haka ne jam’iyyar a Kano ta umarci lauyoyinta da su gaggauta kalubalantar sakamakon zaben a gaban kotu, rahoton Channels Tv.

Wannan lamari dai na zuwa ne kwanaki kadan bayan da Nasiru Gawuna, dan takarar gwamnan APC ya bayyana yiwa Abba Gida-Gida murnar lashe zaben.

Siyasar jihar Kano dai a bana ta zo da sauyi, tsohon gwamna Kwankwaso ya kafa gwamnati ta hanyar karfafa gwiwar Abba Gida-Gida ya zama gwamnan jihar.

Kara karanta wannan

INEC Ki Sake Zaben Gwamna Na Jihar Kaduna – Masu Saka Ido

Ba zan shiga lamarin Abba Gida-Gida ba, inji Kwankwaso

A wani labarin kuma, kun ji yadda Rabiu Kwankwaso ya ce ba zai tsoma baki a lamarin da ya shafi tafiyar da mulkin zababben gwamnan Kano ba.

Wannan na zuwa ne daidai lokacin da wasu ke kokarin bayyana cewa, akwai yiwuwar yake tsoma baki a harkokin mulkin jihar.

Kwankwaso ya yi bayani, ya kuma bayyana gaskiyar abin da yake ji game da mulkin jihar da kuma yadda zai tsayawa ‘yan Kano a yi musu aiki.

Asali: Legit.ng