Mata da ‘Yan Yara 30 Sun Yi Shahada, Sun Nutse a Ruwa Za Su Tserewa ‘Yan Bindiga

• ‘Yan kananan yara da mata sun hallaka yayin tserewa ‘yan bindiga a wani kauyen Zamfara
• Mutanen Birnin Waje a karamar hukumar Bukkuyum sun tashi da harbe-harben bindigogi da asuba
• Jama’a sun nemi su tserewa ‘yan bindigan, amma sai wasunsu suka gamu da hadarin jirgin ruwa

Zamfara - Fiye da mutane 30 suka hallaka kwanakin baya a lokacin da suke neman kubuta daga wasu miyagun ‘yan bindiga a kauyen Zamfara.

Jaridar nan ta Vanguard ta rahoto cewa kananan yara da mata da neman tsira da rayuwarsu sun gamu da ajalinsu a tsakiyar makon da ya gabata.

Abin ya faru ne yayin da kwale-kwalen da ya dauko wadannan mutane ya nutse a cikin ruwa. Ana zargin mutane kusan 30 ne suka yi shahada.

Mazauna garin Birnin Waje a garin Bukkuyum na jihar Zamfara sun ce ‘yan bindiga sun auko masu da kimanin karfe 6:00 na safiyar ranar Laraba.

Kara karanta wannan

'Yan Bindiga Sun Kai Sabon Mummunan Hari, Sun Kashe Mai Anguwa da Wasu Mutune a Jihar Arewa

Premium Times tace Birnin Waje kauye da ke kusa da ruwa da ke kilomita biyu da Bukkuyum. Wani hadimin gwamna ya tabbatar da haka a shafinsa.

Ibrahim Zauma ya yi magana a Facebook, yace hadarin jirgin ruwa ya kashe yara da mata.

'Yan bindiga da Assalatu

Wani mazaunin yankin ya shaidawa manema labarai cewa ana shirin sallar asuba sai ‘yan bindiga suka shigo masu gari, suka fara harbe-harbe ta ko ina.

‘Yan ta’addan sun shigo garin ta kofar yamma, kafin ta’adinsu ya yi nisa sai sauran mutanen da suka farga suka fara yunkurin tserewa zuwa Zauma.

Kafin a kai kauyen Zauma, dole sai an tsallaka wani rafi. A dalilin haka kananan yara da mata da-dama suka shiga cikin kwale-kwale domin su tsira.

Da aka tuntube shi, wani Lawali Sambo ya bayyana cewa ana kokarin dauko gawawwakin wadanda suka kife a jiragen, suka nutse a cikin ruwa.

Kara karanta wannan

Wani Ibtila'i Ya Yi Ajalin Mutum 30 da Suka Gudo Wa Harin Ta'addancin Yan Bindiga a Zamfara

Har zuwa lokacin da aka zanta da Sambo, ‘yan ta’addan suna cikin Birnin Waje. Ana zargin miyagun sun kwana a garin ne, suka fara ta’adi da asuba.

Aikin jirgin kasan Kaduna

A yau ne aka ji labari bayan shekaru bakwai da rabi a mulki, Gwamnatin Najeriya ta fito ta yi bayanin dalilin rashin ƙarasa layin dogon Kaduna-Kano.

Gwamnatin Muhammadu Buhari ta tsara kammala waɗannan ayyuka na layin dogo ne kafin ƙarewar wa’adin mulkin nan, yanzu saura 'yan watanni.

Asali: Legit.ng