Hotuna: Yadda Sadiq Ango ya canza kamanni bayan yin wata 3 hannun 'yan bindiga

• Sadiq Ango Abdullahi, 'dan shugaban kungiyar dattawan arewa, Farfesa Ango Abdullahi, ya shaki iskar 'yanci a ranar Sallah
• Hotunan shi na baya da na yanzu, zasu tabbatar da cewa fasinjojin da aka sace suna shan matukar wahala a wurin 'yan ta'addan
• A hotunan matashin 'dan siyasan na baya, ya kasance 'dan kwalisa da iya ado, amma bayan sako shi ya koma kamar a zubda masa da hawaye

Sadiq, 'dan shugaban kungiyar dattawan arewa, Farfesa Ango Abdullahi, wanda aka yi garkuwa da shi a farmakin jirgin kasan da 'yan ta'adda suka kai ranar 28 ga watan Maris, ya canza kamanni kwata-kwata daga yadda yake a baya kafin yayi watanni uku a daji.

Sadiq yana daga cikin mutum bakwai da 'yan ta'addan suka sako a ranar Asabar, 9 ga watan Yulin 2022.

Kara karanta wannan

Da dumi-dumi: Buhari ya fusata, ya yi kakkausan lafazi kan yajin aikin ASUU

Idan za a tuna, a wani bidiyo da aka saki a watan Mayu, Sadiq wanda yayi nasarar lashe zaben fidda gwani na majalisar wakilai a Zaria, jihar Kaduna duk da yana hannun 'yan ta'adda, ya roki gwamnatin tarayya da ta kawo musu taimako inda yace da yawa daga cikin fasinjojin da aka sace basu da lafiya.

"Kwananmu 62 a nan. Da yawansu bamu da lafiya kuma bamu cikin hali mai kyau. A kowacce rana, lamarin kara tabarbarewa yake yi. Muna kira ga gwamnatin tarayya da ta kawo mana dauki kafin mu fara rasa rayukansu," yace.

Ga hotunan shi na baya, da na lokacin da 'yan ta'addan suka sako shi.

A yayin da Legit.ng ta so jin ta bakin wani makusancin Farfesa Ango Abdullahi, wand ya bukaci a boye sunansa yace tabbas an sako Sadiq Ango amma babu shakka an biya kudin fansa ne.

Kara karanta wannan

Hotunan magidanci mai mata 3 da 'ya'ya 19 sun janyo cece-kuce

Ya bayyana cewa, ganin matashin 'dan siyasan kadai ya isa ya karyar maka da zuciya saboda irin canzawar da yayi gaba daya.

"A gaskiya wadannan mutanen abun tsoro ne, kuma muna fatan Allah ya nisanta mu da su. Idan ka ga Sadiq, kwata-kwata ya fita daga kamanninsa. Mutum ne da muka sani mai kwalliya da tsafta, amma shi ne yau yayi kwanaki 103 da riga daya, babu aski, abun tausayi."

Asali: Legit.ng