An Daure Mai Kamfanin Crypto Shekaru Dubu 11 A Gidan Kaso Kan Zargin Damfara A Turkiyya

• Wata a kotu a kasar Turkiyya ta daure mai kamfanin Thodex na Crypto tsawon shekaru dubu 11 a gidan kaso
• Ana zargin Faruk Fatih Ozer da kirkirar kamfanin Crypto da ke yashe kudaden jama'a da damfararsu
• Masu gabatar da kara na zargin Ozer ya tsere kasar Albaniya a 2021 da kudaden jama'a Dala miliyan 30 wadanda su ka zuba a kamfanin

Turkiyya - Kotu ta tasa keyar Faruk Fatih Ozer shekaru dubu 11,196 a gidan kaso kan zargin damfara a yanar gizo ta hanyar amfani da kudaden Crypto.

An daure Faruk wanda shi ne ya kirkiri Crypto da 'yan uwansa guda biyu kan damfara da kuma kirkirar kamfanin zalunci.

Meye ake zargin matashin a Turkiyya?

Masu gabatar da kara sun bukaci a yanke wa mamallakin kamfanin Thodex, Faruk Fatih daurin shekaru 40 a gidan kaso, cewar Euronews.

Kara karanta wannan

Tsadar Fetur: Yadda Abba Gida Gida Ya Yi Rabon Kayan Tallafi ga Mata da Manoma

Anadolu News Agency ta tattaro cewa 'yan uwan nashi sun samu hukunci daya yayin da aka yanke hukuncin a ranar Alhamis 7 ga watan Satumba.

Faruk ya ce:

"Idan har zan kirkiri kamfanin da zai zalunci jama'a, ba zan yi shi cikin ganganci ba da rashin kwarewa."

Ana zargin Ozer ya gudu kasar Albaniya da Dala biliyan 2 na jama'a a 2021 wanda daga bisani aka karyata yawan kudaden.

Masu gabatar da kara sun zargi Ozer ya tura kudaden kimanin Dala miliyan 30 a wasu sirrantattun asusun bankuna.

Turkiyya ta yi kaurin suna wurin daure mutane a gidan kaso da shekaru masu yawa, cewar Vanguard.

Wannan na zuwa ne bayan kasar ta soke hukuncin kisa a shekarar 2004 don samun damar shiga Kungiyar Nahiyar Turai (EU).

Har ila yau, ana zargin 'yan uwan Ozer guda biyu da handame Dala miliyan 50 na kwastomomin kamfanin.

Kara karanta wannan

Bidiyoyi Da Hotuna Sun Bayyana Yayin da Ganduje, Keyamo, Bala Mohammed Da Sauransu Ke Likimo a Kotun Zaben Shugaban Kasa

'Yan Crypto sun samu kudade bisa kuskure

A wani labarin, 'yan Crypto sun bayyana cewa sun samu kudade a asusun su bisa kuskure daga wani kamfani na Crypto.

Mafi yawan 'yan Crypto a Najeriya sun bayyana cewa sun wayi gari da biliyoyin kudade a asusun su.

Ana zargin wani kamfani ne ya yi kuskurem fasaha tare da tura kudaden a asusun mutane da ke ta'ammali da harkar Crypto.

Asali: Legit.ng