Jerin Sunayen Shugabannin Afirika Da Sojoji Suka Hambarar Da Gwamnatinsu Cikin Shekara 3 Da Suka Wuce

Nahiyar Afirika na fuskantar yawaitar hamɓarar da gwamnatin fararen hula, inda sojoji ke cigaba da karɓe mulki.

Ƙasar Gabon ta zama ta baya-bayan nan inda sojoji suka hamɓarar da gwamnati a ranar Laraba, 30 ga watan Agusta.

A cikin shekara uku da suka gabata sojoji sun hamɓarar da gwamnatocin fararen hula sau bakwai a nahiyar Afirika.

Legit.ng ta tattaro sunayen shugabannin ƙasar da aka hamɓarar.

Shugaba Ali Bongo

Juyin mulki ya ritsa da shugaban ƙasar Gabon a ranar 30 ga watan Agusta, lokacin da wasu sojoji suka sanar da ƙarɓe mulki a ƙasar.

Mutane a babban birnin ƙasar Gabon, Libreville, sun fito suna murnar hamɓarar da gwamnatin Ali Bongo. Hakan ya kawo ƙarshen sama da shekara 50 da ahalinsa suka yi suna mulkar ƙasar mai yawan mutane sama da miliyan biyu.

Kara karanta wannan

Bidiyon Halin da Hamɓararren Shugaban Ƙasar Gabon Ke Ciki Ya Bayyana, Ya Aike da Saƙo Mai Muhimmanci

Shugaba Mohamed Bazoum

Shugaban ƙasar na Jamhuriyar Nijar ya rasa muƙaminsa ne bayan shugaban dakarun tsaron fadar shugaban ƙasa, Janar Abdourahamane Tchiani, ya hamɓarar da gwamnatinsa a ranar 26 ga watan Yulin 2023.

Shugaba Roch Marc Christian Kaboré

Sojoji sun hamɓarar da gwamnatin shugaban ƙasar Burkina Faso bisa umarnin Paul-Henri Sandaogo Damiba, wanda ya karɓe ikon sansanin sojojin ƙasar a ranar 23 ga watan Janairun 2023.

Sojojin sun yi nuni da cewa taɓarɓarewar tsaro da ƙarin ayyukan ƴan ta'adda, su ne dalilan da suka sanya suka hamɓarar da gwamnatin.

Haka kuma watanni tara bayan hamɓarar da gwamnatin Shugaba Kabore, wasu sojoji sun ƙara yin juyin mulki a ƙasar.

Shugaba Omar al-Bashir

Janar Abdel Fattah al-Burhan ya hamɓarar da gwamnatin shugaban ƙasar Sudan, Omar al-Bashir a shekarar 2019.

Tun daga wannan juyin mulkin har yanzu ƙasar ta kasa samun zaman lafiya.

Shugaba Alpha Condé

Kara karanta wannan

Sojojin Juyin Mulkin Gabon Sun Zayyano Dalilai 4 Da Suka Sanyasu Kifar Da Gwamnatin Kasar

Mamady Doumbouya ya sace shugaban ƙasar Guinea mai shekara 83 a watan Satumban 2023, bayan shugaban ƙasar ya sauya kundin tsarin mulkin ƙasar ta yadda zai cigaba da mulki a karo na uku.

Tun daga wannan lokacin Doumbouya ya ƙi mayar da mulki hannun farar hula, inda ya dakatar da amfani da kundin tsarin mulki.

Shugaba Ibrahim Boubacar Keïta

Sojoji sun hamɓarar da gwamnatinsa a shekarar 2020 bayan hargitsin da ya biyo bayan zaɓen ƴan majalisar ƙasar na watan Maris da Afirilu, da sace shugaban ƴan adawar ƙasar Soumaila Cissé.

Tun daga wannan lokacin ƙasar ta shiga cikin rigingimun siyasa inda aka ƙara yin wani juyin mulkin a watan Mayun 2021.

Shugaba Idriss Déby

Shugaban ƙasar na Chadi ya rasa ransa a hannun ƴan tawayen ƙasar a ranar 20 ga watan Afirilun 2021. Deby ya hau kan mulki ne bayan ya yi juyin mulki a shekarar 1999.

Kara karanta wannan

Muhimman Abubuwan Sani 5 Dangane Da Hambararren Shugaban Kasar Gabon, Ali Bongo

A yayin da wa'adin shekara 30 na mulkin Deby ya ƙare, har yanzu ƙasar ba ta koma kan turbar dimokuraɗiyya ba inda sojoji su ke cigaba da jagorantar ƙasar.

Kasashen Rwanda Da Kamaru Sun Firgita

A wani labarin kuma, ƙasashen Rwanda da Kamaru sun yi garambawul kan rundunar tsaron ƙasashensu.

Garambawul ɗin na zuwa ne bayan sojoji sun hamɓarar da gwamnatin Shugaba Ali Bongo na ƙasar Gabon.

Asali: Legit.ng