Ana Tsaka da Neman Gurbi a Kofin Duniya, Kocin Super Eagles, Finidi Ya Yi Murabus
- Rahotanni da muke samu sun tabbatar da cewa kocin Super Eagles, Finidi George ya yi murabus daga mukaminsa
- Finidi mai shekaru 53 ya yi murabus ne a yau Asabar 15 ga watan Yuni makwanni kadan bayan karbar ragamar kungiyar
- Hakan bai rasa nasaba da rashin katabus a wasanni biyu na neman gurbin gasar kofin duniya da aka yi a kwanakin nan
Abdullahi Abubakar, Editan Legit Hausa ne ta bangaren siyasa, kasuwanci da al'amuran yau da kullum, ya na da gogewar aikin jarida sama da shekaru uku.
FCT, Abuja - An ruwaito cewa kocin kungiyar Super Eagles, Finidi George ya yi murabus daga mukaminsa.
Murabus din bai rasa nasa da rashin tabuka wani abu bayan karbar ragamar Super Eagles da Finidi ya yi.
Asali: Getty Images
Super Eagles: Finidi George ya yi murabus
Wannan na kunshe ne a cikin wata sanarwa da dan jarida a bangaren wasanni, Adepoju Tobi Samuel ya walllafa a shafin X.
LURA: Shin kana son bamu labari da tattaunawa da marubutanmu? Tuntubemu a info@corp.legit.ng
"Majiyoyina sun tabbatar min cewa Finidi George ya yi murabus daga mukaminsa na kocin Super Eagles."
- Tobi Samuel
Wani dan jarida a bangaren wasanni, Sulaiman Pooka Adebayo shi ma ya tabbatar da haka.
"Finidi George ya yi murabus bayan mayar da shi baya yayin da za a dauko koci daga kasar waje."
- Sulaiman Pooja
Finidi George ya karbi ragamar Super Eagles
Finidi George mai shekaru 53 ya karbi ragamar kocin kungiyar ne bayan karewar kwantiragin tsohon kocinta, Jose Peseiro a watan Faburairun 2024.
Ya kasance a matsayin mataimakin Peseiro na tsawon watanni 20 kafin kwantiragin tsohon kocin ya kare.
Murabus din bai rasa nasaba da rashin katabus yayin da Super Eagles ta yi rashin nasara a wasanni uku a neman gurbin gasar kofin duniya.
Super Eagles za ta dauko sabon koci
Kun ji cewa Hukumar kula da kwallon kafar Najeriya (NFF) ta yanke shawarar dauko hayar mai horar da 'yan wasa daga Turai domin jan ragamar tawagar Super Eagles.
An ce NFF za ta dauko wa Super Eagles hayar koci daga Turai biyo bayan shan kashin da tawagar ta yi a wasanni biyu jere, karkashin Finidi George.
Kwamitin zartarwar hukumar sun yanke wannan shawarar ne a wani taro da suka yi a makon da ya gabata.
Asali: Legit.ng
