A Karshe, INEC Ta Sanar da Sakamakon Zaben 'Yan Majalisa da Aka Gudanar a Kano

• APC ta lashe zaben kujerun majalisar dokokin jiha na mazabun Ungogo da Kano Municipal a zaben cike gurbi na ranar Asabar
• INEC ta ce an sami karancin masu kada kuri'a sakamakon azumin Ramadan da kuma rashin shigar manyan jam'iyyun adawa
• Babban jami'in INEC ya yaba wa mazauna Kano bisa gudanar da zaben cikin lumana ba tare da samun wani tashin hankali ba

Sani Hamza, kwararren edita ne a fannin nishadi, al'amuran yau da kullum da kuma siyasa. Sani yana da shekaru sama da biyar a aikin jarida.

Kano - Jam'iyyar APC ta yi nasara a zaɓukan cike gurbi na majalisar dokokin jihar Kano da aka gudanar a ranar Asabar a mazabun Ungogo da Kano Municipal.

Aliyu Nabil Daneji ne ya lashe kujerar Kano Municipal da ƙuri'u 7,484, yayin da Aminu Sa’ad Sa’ad ya lashe ta Ungogo da ƙuri'u 8,975.

Farfesa Ibrahim Tajo Siraj da Farfesa Ali Tijjani Abdullahi ne suka sanar da sakamakon zaɓen a mazabunsu daban-daban, inda suka tabbatar da nasarar ƴan takarar na APC, in ji rahoton Daily Trust.

Kara karanta wannan

Kwali: APC ta san matsayinta bayan INEC ta fadi sakamakon zaben ciyaman a Abuja

Rashin fitowar jama'a a zaben Kano

Babban jami'in hukumar INEC a jihar Kano, Ambasada Abdu Zango, ya bayyana cewa an sami ƙarancin fitowar jama'a sosai yayin zaɓen.

Ya danganta hakan da lokacin zaɓen da ya faɗo a cikin watan Ramadan, da kuma rashin shigar manyan jam'iyyun adawa cikin takarar.

Ambasada Abdu Zango ya bayyana:

"Ina ganin har da kasancewar zaben ya fada a cikin watan Ramadan ne ya sa aka sami ƙarancin jama'a, sannan mutane suna ganin zaɓe ne tsakanin mutane kaɗan."

Duk da ƙarancin jama'an, REC ya yaba wa mazauna jihar Kano saboda yadda suka nuna halin dattako, inda aka gudanar da zaɓen cikin lumana ba tare da samun wani rikici ba yau.

Jami'an tsaro sun tabbatar da cewa babu wani rahoton tashin hankali ko fito-na-fito da aka samu a dukkanin rumfunan zaɓen da aka gudanar da aikin.

Rashin jam'iyyun adawa a zaben Kano

Legit Hausa ta rahoto cewa ba a ga tambarin manyan jam'iyyun adawa irin su NNPP, PDP, da ADC a kan takardar zaɓen ba a wannan karon.

Kara karanta wannan

PDP ko APC?: INEC ta fadi jam'iyyar da ta lashe zaben ciyaman a Bwari, Abuja

Ambasada Zango ya bayyana cewa laifin jam'iyyun ne idan ba su shiga zaɓe ba, domin INEC ba ta tsoma baki wajen zaɓar waɗanda za su fito takara yanzu.

A cewar sa, duk jam'iyyar da ta gudanar da sahihin zaɓen fitar da gwani kuma ta miƙa sunayen ƴan takara ga INEC, ita ce ke da haƙƙin shiga zaɓe yau.

APC ta kara karfi a majalisar Kano

Rashin shigar jam'iyyar NNPP, wadda ita ce ke mulkin jihar, ya ba wa APC damar samun nasara cikin sauƙi a waɗannan mazabu biyu na birnin Kano yanzu.

Wannan nasara ta ba wa jam'iyyar APC ƙarin kujeru a majalisar dokokin jihar, wanda hakan zai iya sauya yanayin siyasar jihar nan ba da daɗewa ba.

Sababbin zaɓaɓɓun mambobin sun yi alƙawarin wakiltar jama'arsu yadda ya kamata tare da kawo ayyukan ci gaba a mazabunsu na Ungogo da Kano Municipal yau.

APC ta lashe zabe a Abuja

A wani labari, mun ruwaito cewa, INEC ta ayyana cewa Daniel Nuhu na jam'iyyar APC ya lashe zaben shugaban karamar hukumar Kwali da kuri'u 17,032.

Kara karanta wannan

APC ta sha kasa: INEC ta sanar da sakamakon zaben ciyaman da aka gudanar a Abuja

'Dan takarar na APC ya doke Haruna Pai na PDP wanda ya samu kuri'u 8,575 a zaben na ranar Asabar da aka gudanar.

Zuwa yanzu jam'iyyar APC ta lashe kananan hukumomi uku da suka hada da AMAC da Bwari da kuma Kwali a zaben Abuja.

Asali: Legit.ng