Gwamna Ya Fadi Alakarsa da El Rufai, Ya Magantu kan Barinsa APC da Hana Shi Minista

• Gwamna Abdullahi Sule na jihar Nasarawa ya yi magana kan alakarsa da tsohon gwamna, Nasir El-Rufai da hana shi mukamin Minista
• Abdullahi Sule ya ce babu yadda za a shigo da matsalar nadin Nasir El-Rufai a matsayin Minista cikin ganawar gwamnonin APC
• Sule ya tabbatar da cewa Nasir El-Rufai bai fice daga jam’iyyar APC ba, duk da tsaikon nadin shi a watan Agustan 2023
• Hakan ya biyo bayan rawar da El-Rufai ya taka rawa wajen tabbatar da tikitin shugabancin APC ya koma Kudu a zaben 2023

Abdullahi Abubakar, Editan Legit Hausa ne ta bangaren siyasa, kasuwanci da al'amuran yau da kullum, ya na da gogewar aikin jarida sama da shekaru uku.

Lafia, Nasarawa - Gwamna Abdullahi Sule na jihar Nasarawa ya magantu kan yanayin da ake ciki tsakaninsu da tsohon gwamna, Nasir El-Rufai.

Gwamnan ya ce yana da alaƙa mai kyau tsakaninsa da El-Rufai amma bai sake yin magana da shi ba tun bayan ya bar mulki.

Kara karanta wannan

Abin da ya hana gwamnoni taimakon Malam El Rufai lokacin da aka naɗa shi minista

Gudunmawar El-Rufai domin nasarar Tinubu a 2023

Gwamna Sule ya bayyana haka ne a daren jiya Laraba, 8 ga watan Janairun 2025 yayin hira da gidan talabijin na Channels.

El-Rufai yana cikin jagororin Arewacin Najeriya da suka goyi bayan mika tikitin shugaban kasa na APC zuwa Kudu bayan kammala wa'adin Muhammadu Buhari.

Wannan matakin ya dace da tsarin karba-karba na mulki tsakanin yankunan Kudu da Arewa bayan wa’adin mulkin Buhari na shekaru takwas.

El-Rufai, wanda ya yi gwamna a jihar Kaduna daga 2015 zuwa 2023, ya nuna goyon baya ga tsohon gwamnan Lagos, Bola Tinubu, a matsayin dan takarar APC.

Gwamna Sule ya magantu kan hana El-Rufai Minista

Gwamna Sule ya ce ba za a iya shigar da gwamnonin APC cikin lamarin Nasir El-Rufai ba musamman kan hana shi mukamin Minista.

Gwamnan ya ce Nasir El-Rufai bai bar jam'iyyar APC ba, duk da cewa Majalisar Tarayya ta ki amincewa da nadinsa a watan Agustan 2023.

Kara karanta wannan

'Magana ta fara fitowa': Hamza Al Mustapha ya fadi dalilin ganawa da El Rufa'i

Gwamna ya kore maganar El-Rufai zai bar APC

“El-Rufai bai bar jam’iyyarmu ba, har yanzu yana cikin jam’iyyarmu, ya yi kusa a fara wannan magana."

“Tun da ya bar ofis, ban yi magana da El-Rufai ba, ban san inda yake ba, ko abin da yake yi ba.”

“Ban san komai game da motsinsa ba, amma na ga maganganu da barazanar mutane daban-daban, duk da haka lokaci bai yi ba.”

- Abdullahi Sule

El-Rufai ya gana da Al-Mustapha da jigon PDP

A baya, kun ji cewa ana ta hasashen hadakar jam'iyyun adawa a Najeriya musamman game da zaben 2027, manyan yan siyasa sun gana a birnin Tarayya Abuja.

Tsohon gwamnan jihar Kaduna, Nasir El-Rufai ya yi wata ganawa da Manjo Hamza Al-Mustapha da shugaban jam'iyyar SDP da jigon PDP, Otunba Segun Showunmi.

Rahotanni sun tabbatar da cewa ganawar ba ta rasa nasaba da halin da kasa ke ciki da kuma shirye-shiryen jam'iyyun adawa kan zaben 2027 da Bola Tinubu.

Muhammad Malumfashi, babban edita a sashen Hausa na Legit ya duba labarin.

Asali: Legit.ng