"An Kusa Daina Ganin Jar Hula": Jam'iyyar APC Ta Kara Rikita NNPP a Jihar Kano

• Mataimakin shugaban majalisar dattawa, Sanata Barau I. Jibrin ya karɓi wasu kusoshi da ƴan NNPP da sauka sauya sheka zuwa APC a Kano
• Barau ya ce ƴaƴan NNPP na ci gaba da tururuwa zuwa APC saboda ayyukan da gwamnatin shugaban ƙasa Bola Ahmed Tinubu ke yi
• A cewarsa, nan gaba kaɗan za a nemi jar hula watau alamar ƴan Kwankwasiyya a rasa a faɗin jihar Kano

Ahmad Yusuf, kwararren edita ne a Legit Hausa da ya shafe tsawon shekaru yana kawo muku rahotannin siyasa, nishadi da al'amuran yau da kullum

Kano - Ɗaruruwan mambobin jam'iyyar NNPP sun bar tafiyar Kwankwasiyya a Kano, sun sauya sheƙa zuwa jam'iyyar APC.

Mataimakin shugaban majalisar dattawa, Sanata Barau I. Jibrin, shi ne ya karɓi masu sauya sheƙar ciki har da manyan jiga-jigan NNPP a ofishinsa da ke Abuja.

Kara karanta wannan

Kwankwaso ya bayyana abin da 'yan Najeriya za su yiwa APC a 2027

Wani babban jigo a NNPP, Garba Rama Rano da wasu manyan ƙusoshi na cikin waɗanda suka rungumi APC a wannan karon.

Hakan na kunshe ne a wasu saƙonni haɗe da hotuna da Sanata Barau I. Jibrin ya wallafa a shafinsa na X.

'APC na ƙara samun karbuwa a Kano'

Da yake jawabi bayan karɓar masu sauya sheƙar, mataimakin shugaban majalisar dattawa ya ce nan ba da jimawa ba za a daina ganin masu jar hula a Kano.

Sanata Barau ya ce yadda ƴaƴan NNPP ke turuwa zuwa APC ciki har da shugabanni alama ce da ke nuna jam'iyyar na ƙara samun karɓuwa da goyon baya.

A cewarsa, duk da APC na tsagin adawa amma yadda ƴan Kwankwasiyya ke cire jar hula, suna dawowa cikinta ya kara nuna jam'iyyar na ƙara farin jini a Kano.

Kara karanta wannan

'Yan bindiga sun sace shugaban jam'iyyar APC, sun harbe shi ahmlahira a jihar Arewa

"Za mu kawar da jar hula" - Barau

"Zan ci gaba da karɓar ƴan NNPP da ke son dawowa APC, siyasa ta gaji haka domin idan kana cikin jam'uyya amma ba a shigowa cikinta lallai akwai matsala.

"APC ta zama abin sha'awa ga ƴaƴan NNPP saboda ɗumbin ayyukan alherin da gwamnatin Bola Tinubu take yi a Kano da ƙasa baki ɗaya, za mu ci gaba da karɓar ƴan NNPP da sauran ƴan siyasa ba ruwanmu da surutun wasu.

"Nan gaba za ku nemi mai jar hula, alamar Kwankwasiyya a Kano ku rasa, lokaci zai yi da nemo mai jar hula zai zama abu mai matuƙar wahala, nan ba da jimawa za mu kawo wurin."

- Barau I. Jibrin.

Wani ɗan NNPP a Kano, Sa'idu Abdullahi, ya shaidawa Legit Hausa cewa waɗannan masu sauya sheƙar ba ƴan Kwankwasiyya amana ba ne.

A cewarsa, duk da ya aminta da an yi wasu kura-kurai bayan kafa gwamnati a Kano amma yana ganin sauya sheƙa ba shi ne mafita ba.

Kara karanta wannan

Dan jam'iyyar PDP ya sauya sheka zuwa APC a zauren Majalisar tarayya

"Ba na tunanin akwai ranar da za ta zo nan kusa a ce gaba ɗaya ƴan kwankwasiyya sun cire jar hula, mutanen Kano ba su manta alheri.

"Shi Barau da yake wannan zancen yaudararsa kawai ake yi, duk da na san akwai waɗanda ke ganin ba a musu adalci ba bayan hawa mulki amma ba na ganin sauya sheka shi ne mafita," in j shi.

Kwankwaso ya hango makomar APC a 2027

A wani labarin kun ji cewa jagoran jam'iyyar NNPP na ƙasa, Rabiu Musa Kwankwaso, ya caccaki APC mai mulki a Najeriya.

Kwankwaso ya bayyana cewa APC ta wahalar da ƴan Najeriya kuma za su sauya ta a babban zaɓen shekarar 2027 da ke tafe.

Asali: Legit.ng