Kafin Shiga Ofis, Atiku Ya Kawo Gyara a Tsarin Mulkin Shugaban Kasa da Gwamnoni

• Dan takarar shugaban kasa a zaben 2023, Atiku Abubakar ya ba da shawara kan tsarin shugabanci a Najeriya
• Atiku ya ce ya kamata shugaban kasa da gwamnoni su yi wa'adi daya kacal na shekaru shida sabanin tsarin yanzu
• Tsohon shugaban kasar ya kuma bukaci damawa da dukan yankuna shida na Najeriya daga Arewa zuwa Kudu

Abdullahi Abubakar, Editan Legit Hausa ne ta bangaren siyasa, kasuwanci da al'amuran yau da kullum, ya na da gogewar aikin jarida sama da shekaru uku.

FCT, Abuja - Tsohon mataimakin shugaban kasa, Atiku Abubakar ya bukaci sauyin tsarin mulki na shugaban kasa da gwamnoni.

Atiku Abubakar ya rubuta wasika ga Majalisar Tarayya domin ba shugaban kasa damar yin wa'adi daya na shekaru shida kacal.

Atiku ya ba da shawara kan tsarin mulki

Kara karanta wannan

'Ba a saurare shi ba,' Yadda aka yi rubdugu ga Tinubu kan jawabin 1 ga watan Oktoba

Tsohon dan takarar shugaban kasar ya kuma bukaci juya shugabancin tsakanin yankin Kudu zuwa Arewa, cewar Punch.

Atiku ya bukaci Majalisar da ta yi gyara a sashe na 132 inda ya ba da shawara kan mafi karanci shaidar karatu ga yan takara.

"Ya kamata a rika juya ofishin shugaban kasa zuwa duka yankuna shida na Najeriya kuma ya zama wa'adi daya na shekaru shida."

"Duba da karamin sashe na daya, ya kamata shugaban kasa ya bar ofishi bayan kammala shekaru shida"

- Atiku Abubakar

Atiku ya bukaci gyara a neman takara

Atiku ya bukaci sauya satifiket na sakandare a matsayin mafi karancin shedar karatu na neman shugabanci a Najeriya.

Ya ce ya kamata a ce shaidar karatu na 'Difloma' ya zama mafi karancin takardar karatun neman wani mukami.

Har ila yau, Atiku ya ba da shawara kan ba jam'iyyun siyasa karfi wurin zaben dan takararsu a zabe.

Kara karanta wannan

"Kai ka jawo tsadar rayuwa": 'Dan majalisa ya cire tsoro ya fadawa Tinubu gaskiya

Wani masoyin PDP ya tattauna da Legit Hausa kan shawarar da Atiku Abubakar ya bayar kan tsarin shugabanci.

Aliyu Abubakar ya ce tabbas shawarar ta nuna Atiku gyara ya ke son kawowa ba son ransa ba.

Aliyu ya ce idan da son rai ne da ba zai taba kawo shawara irin haka ba saboda yana tsammanin zama shugaban kasa a 2027.

A karshe, ya shawarci yan Najeriya su yi wa kansu karatun ta natsu domin sauya gwamnatin Bola Tinubu a Najeriya.

Atiku ya soki gwamnatin Tinubu kan NLC

Kun ji cewa tsohon mataimakin shugaban kasa, Atiku Abubakar ya caccaki gwamnatin Bola Ahmed Tinubu saboda matakin da ta dauka kan NLC.

Atiku Abubakar ya ce yadda gwamnatin kasar nan ke kokarin murkushe kungiyoyin kwadago na nuna tsagwaron zalunci ne da abin takaici.

Muhammad Malumfashi, babban edita a sashen Hausa na Legit ya duba labarin.

Asali: Legit.ng