Zaben Edo: Dan Takarar PDP Ya Fadi Wanda Zai Yi Nasara da Gagarumin Rinjaye

• Ɗan takarar gwamna na jam'iyyar PDP a jihar Edo ya kaɗa ƙuri'arsa a zaɓen na ranar Asabar, 21 ga watan Satumban 2024
• Asue Ighodalo ya nuna ƙwarin gwiwar cewa shi ne zai samu nasara a zaɓen idan har ba a tafka maguɗin zaɓe ba
• Ɗan takarar na PDP ya bayyana cewa bayanan da yake samu sun nuna cewa nasara ta shi ce a zaɓen gwamnan

Editan Legit Hausa Sharif Lawal yana da ƙwarewar shekaru wajen kawo rahotannin siyasa, al'amuran yau da kullum, tsegumi da nishaɗi

Jihar Edo - Ɗan takarar jam'iyyar PDP a zaɓen gwamnan jihar Edo, Asue Ighodalo ya ce shi ne zai yi nasara da gagarumin rinjaye a zaɓen.

Asue Ighodalo ya bayyana hakan ne bayan ya kaɗa ƙuri'arsa a rumfar zaɓensa da ke makarantar firamare ta Indinrio a Okaigben Ewohomi cikin ƙaramar hukumar Esan ta Kudu maso Gabas ta jihar.

Kara karanta wannan

Zaben Edo: Oshiomole ya yi martani kan zargin APC na siyan kuri'u

Jaridar Daily Trust rahoto cewa Asue Ighodalo ya kaɗa ƙuri'ar ne tare da matarsa, Ifeyinwa Ighodalo da ƙaninsa, Fasto Ituah Ighodalo.

Asue Ighodalo ya hango nasara a zaɓen Edo

Da yake magana da ƴan jarida, ɗan takarar gwamnan na PDP ya bayyana cewa yana da ƙwarin gwiwar yin nasara idan ba a yi maguɗi a zaɓen ba, rahoton jaridar The Nation ya tabbatar.

Asue Ighodalo ya kuma yabawa jami'an sojoji kan yadda suka samar da tsaro a lokacin zaɓen.

"Ina jin jita-jita cewa suna son murɗe zaɓen, amma bisa ga bayanan da nake samu, jam'iyyar PDP ce za ta lashe zaɓen.

"Zan kira wanda ya yi nasara a zaɓen idan an yi zaɓe na gaskiya da adalci, amma nine wanda za a kira."

- Asue Ighodalo

Oshiomole ya magantu kan zaɓen Edo

A wani labarin kuma, kun ji cewa tsohon gwamnan jihar Edo, Sanata Adams Oshiomole, ya yi magana kan zargin APC ta shirya siyan ƙuri'u a zaɓen gwamnan jihar.

Adams Oshiomole ya musanta zargin cewa jam'iyyar ta tanadi tulin kuɗi domin amfani da su wajen siyan ƙuri'u a hannun mutane a lokacin zaɓen.

Asali: Legit.ng