Majalisar Tarayya Ta Bayyana Mataki Mai Kyau da Ta Ɗauka Domin Share Hawayen Ƴan Najeriya

• Majalisar wakilai ta yi magana kan tsadar rayuwa, rashin tsaro da sauran wahalhalun da ƴan Najeriya suka tsinci kansu a ciki
• Shugaban majalisar, Tajudeen Abbas, ya ce shi da sauran ƴan majalisa suna shan radadi irin wanda al'umma ke sha a yanzu
• Ya ce majalisar za ta yi duk mai yiwuwa wajen taimakawa gwamnatin tarayya a warware dukkan waɗannan kalubale

Ahmad Yusuf, kwararren edita ne a Legit Hausa da ya shafe tsawon shekaru yana kawo muku rahotannin siyasa, nishadi da al'amuran yau da kullum

FCT Abuja - Shugaban majalisar wakilan tarayya, Abbas Tajuddeen, ya ce majalisa na jin radaɗin da ƴan Najeriya ke ji yayin da rayuwa ta yi tsada a ƙasar nan.

Abbas ya kuma bayyana cewa majalisar tana tare da su a fafutukar neman samun ingantacciyar rayuwa, kamar yadda The Nation ta ruwaito.

Kara karanta wannan

An shiga rudani kan batun mutuwar babban basarake a Najeriya, an fadi gaskiyar abin da ya same shi

Ya yi wannan furucin ne a wurin taron manema labarai na duniya wanda ya gudana a birnin tarayya Abuja ranar Alhamis, 8 ga watan Fabrairu, 2024.

Wane mataki majalisar za ta ɗauka?

Ya ce majalisar wakilai ba ta manta da matsalolin rashin tsaro da ke kara ta’azzara a faɗin kasar ba.

A cewarsa, za su yi duk mai yiwuwa domin ganin majalisa ta taimaka wa gwamnati wajen samar da ingantacciyar rayuwa ga al’ummar Najeriya.

Shugaban majalisar ya ƙara da cewa a yanzu ƴan Najeriya na cikin jarabawa amma ya jaddada cewa duk da haka jajircewa da haɗin kan kasa ba zai taɓu ba.

Ya ce kaddamar da jiragen helikwafta na yaki guda biyu da sojoji suka yi wata alama ce da ke nuna cewa gwamnati ta kuduri aniyar magance matsalolin tsaro.

Bugu da ƙari, Abbas ya nanata cewa majalisar wakilai ba zata kama hannu ta zuba ido ba, za ta bada duk abin da ake buƙata daga gare ta domin taimakawa gwamnati.

Kara karanta wannan

Matsalar tsaro: Birnin tarayya Abuja na fuskantar babbar barazana, majalisar dattawa ta magantu

Ya ce taron tsaro da majalisar ta shirya yi nan gaba, ta kirkiro shi ne da nufin hada kan masana domin yin nazari da lalubo hanyoyin da za a bi wajen kawar da duk wani kalubalen tsaro a kasar nan.

Shin farashin fetur zai kara tashi nan kusa?

A wani rahoton kuma Kamfanin mai na ƙasa NNPCL ya musanta rahoton da ke yawo cewa farashin man fetur zai ƙara tashi a Najeriya.

Ya kuma shawarci masu ababen hawa da su kaucewa sayen mai da haɗa cunkoso a gidan mai saboda tsoron ƙara farashi.

Asali: Legit.ng