Pdp Ta Gabatar Da Babban Bukata Bayan Batar Kayan Zabe a Hatsarin Jirgin Ruwan Bayelsa

Yenagoa, Jihar Bayelsa - Babban jam'iyyar hamayya a Najeriya, Peoples Democratic Party, PDP, ta bukaci a maye gurbin kayayyakin zabe da suka bace a hatsarin jirgin ruwa da ya faru a jihar Bayelsa.

Jam'iyyar ta PDP ta gabatar da wannan bukatar ne cikin wani gajeren sanarwa da ta fitar a ranar Asabar, 11 ga watan Nuwamba. An wallafa sanarwar a shafin jam'iyyar na kafar X.

"A kai kayan zabe Koluama": PDP ta fada wa INEC

Idan za a iya tunawa jami'an hukumar zabe 12 sun tsallake rijiya da baya lokacin da jirgin ruwa da ke dauke da su zuwa Koluama a karamar hukumar Kudancin Ijaw ya kife a daren ranar Juma'a, 10 ga watan Nuwamba.

Kara karanta wannan

Zaben gwamnan Imo 2023: 'Yan sanda sun yi arangama da wakilan jam’iyya, an yi harbe-harbe

Takardun rubuta sakamakon zabe, na'urar caji, da jakunna dauke da kayan zabe da wasu kayayyakin jami'an na INEC duk sun salwanta.

A martaninta kan afkuwar lamarin, jam'iyyar PDP ta bukaci Hukumar Zabe mai Zaman Kanta (INEC) kada ta tauye wa mutanen yankin hakkinsu na yin zabe.

Sanarwar na PDP ya ce:

"Hukumar Zabe na Kasa mai Zaman Kanta (INEC) @inecnigeria ta tabbatar cewa ba a tauye wa mutanen Koluama da ke Karamar Hukumar Kudancin Ijaw na Jihar Bayelsa hakkin kada kuri'a a zaben gwamnan jihar Bayelsa ba saboda bacewar kayan zabe a ranar Juma'a, 10 ga watan Nuwamban 2023, a hatsarin jirgi.

"INEC ta tabbatar cewa an sake turawa mutanen kayan zabe a kan lokaci zuwa Koluama."

Kazalika, jam'iyyar ta ce "za ta cigaba da sa ido domin tabbatar da ingantaccen zabe a Jihar Bayelsa".

Dakaci karin bayani ...

Asali: Legit.ng