Za a Fito da Sunayen Ministoci, Gwamnoni da Tsofaffin Gwamnonin APC Sun Huro Wuta

• Nan ba da dadewa ba ake sa ran za a sanar da wadanda ake so a ba kujerar Ministocin tarayya
• Tsofaffin Gwamnonin APC da su ka taimakawa Bola Tinubu a zaben shugaban kasa sun huro wuta
• ‘Yan APC na kokarin ba shugaban kasa ciwon kai game da wadanda zai ba mukamai a gwamnatinsa

Abuja - Wasu tsofaffin da Gwamnoni masu-ci a jam’iyyar APC mai-mulki sun damu game da bata lokacin da aka yi wajen fitar da sunayen Ministoci.

Vanguard ta ce jagororin na APC sun matsawa Shugaban kasa Bola Ahmed Tinubu lamba a kan nadin Ministocin da a sanar da ‘yan awanni kadan.

A halin yanzu kwanaki uku su ka ragewa sabon shugaban Najeriyan, gwamnonin da su ka taimakawa APC a zaben da ya wuce su na so a tuna da su.

Kara karanta wannan

A Kurarren Lokaci, Tinubu Ya Cire Mutum 4 a Jerin Wadanda Za A Ba Kujerar Minista

Gwamnoni sun bada sunaye 3

Sannan akwai Gwamnonin da ke kan mulki a jam’iyyar APC da ke son su samu ta-cewa game da wadanda za a zaba a matsayin Ministoci daga jihohinsu.

Rahoton ya ce wadannan Gwamnoni sun ba shugaban kasa sunayen kwararrun mutum uku da zai zaba su shiga majalisar zartarwa bayan tantance su.

Wata majiya a majalisar dattawa ta ce a safiyar Talata za a fito da sunayen wadanda aka zaba a matsayin Ministoci, sai a fara tantance su a ranar Alhamis.

Jihohin da za a gwabza

Wani da ya san abubuwan da ke faruwa, ya shaidawa jaridar cewa Bola Tinubu ya maida hankali a kan Ministocin da zai nada daga Ribas, Legas da Kano.

A matsayin mataimakin shugaban kasa, Kashim Shettima ya samu damar kawo sunayen wadanda za a ba kujerar Minista daga jihohin Arewa maso gabas.

Kara karanta wannan

Ko an ki ko an so: Akpabio Zai Fito da Sunayen Ministoci a Makon da Za a Shiga

A jihohi kamar Ribas, za a tada kura a kan nadin Nyesom Wike a matsayin Minista duk da ya na PDP. Babu mamaki FEC ta kunshi jiga-jigan PDP, LP da NNPP.

'Yan G5 za su samu Ministoci?

Ana ganin jigon na G5 ya ba Tinubu gudumuwa a takarar 2023, sai dai asalin ‘ya ‘yan jam’iyyar APC sun huro wuta cewa bai dace a manta da irin kokarin su ba.

Shi ma Gwamna Seyi Makinde zai kawo sunayen wadanda yake so a ba mukami a gwamnatin Tinubu, ko da ya na PDP, ya taimaki APC a babban zaben bana.

Doka ta wajabta nadin mukamai

Ana da labari cewa a cikin makon nan, dole za a san su wanene za su zama Ministocin Shugaba Bola Tinubu wanda ya dare kan mulki a watan Mayu.

Wajibi ne sabon shugaban kasa da Gwamnoni su fitar da sunayen Ministoci da kuma Kwamishinoninsu bayan 'yan Majalisa sun yi wa tsarin mulki garambawul.

Asali: Legit.ng