Zaben 2023: An Bayyana Peter Obi a Matsayin Wanda Ya Lashe Zabe a Jihar Rivers Ba Tinubu Ba

• An bankado bayanai da suke nuni da cewa dan takarar jam’iyyar Labour, Peter Obi ne ya lashe zabe a jihar Rivers
• Rahotanni sun tabbatar da an tafka magudi a zaben da aka gudanar a watan Faburairu ta wannan shekarar a jihar
• A karamar hukumar Oyigbo, Obi ya samu kuri’u 20,000 yayin da Tinubu ya gaza samun kur’u 5,000 a zaben

Port Harcourt - An bayyana dan takarar jam’iyyar Labour, Peter Obi a matsayin wanda ya lashe zaben jihar Rivers da gudanar a ranar 25 ga watan Faburairu na wannan shekara, ba Bola Tinubu ba.

Wasu rahotanni sun tabbatar da cewa an tafka magudi a zaben da aka yi a jihar Rivers wanda ya bai wa jam’iyya mai mulki ta APC da zababben shugaban kasa, Bola Tinubu nasara.

Kara karanta wannan

Shugaban Kasa Yana Landan, Osinbajo Ya Amince a Kafa Sababbin Jami’o’i 36 a Najeriya

Rahoton BBC ya tattaro kuri’un da Peter Obi da Tinubu suka samu bayan tattaro sakamako daga mazabu daban-daban da Hukumar Zabe mai Zaman Kanta ta INEC ta sanar.

Rahoton jaridar Tribune ya ce Tinubu bai samu kuri’u mafi yawa ba a jihar bayan binciko sakamako daga mazabu fiye da 6,000 a inda aka samu karin fiye da kuri'u 106,000 a cikin alkaluman, idan aka kwatanta da sakamakon zabe daga mazabun.

An samu mabambantan sakamako a zaben jihar Rivers

A karamar hukumar Oyigbo, Obi ya samu kuri’u 20,000 yayin da Tinubu ya gaza samun kuri’u sama da 5,000, amma sai aka sanar cewa Tinubu ya samu fiye da kuri’u 15,000 yayin da Obi yake da kasa da kuri’u 13,000.

Haka a karamar hukumar Obio/Akpor

A karamar hukumar Obio/Akpor, an sanar cewa Tinubu ya na da kuri’u 80,239 amma kuri’u 17,293 ne ya yi dai dai da na mazabar.

Kara karanta wannan

Pantami da Wasu Ministocin Buhari 9 Da Za Su Iya Tsira da Kujerunsu a Mulkin Tinubu

Yayin da aka sanar cewa Obi ya samu kuri'u 3,829, amma BBC ta ce ta kirga kuri’u 74,033 na Peter Obi wanda ya yi dai dai da sakamakon da aka samu a mazabar.

Zaben da aka gudanar a watan Faburairu ya bar baya da kura inda jam’iyyu da dama suka shiga kotu da korafe-korafen cewa an tafka magudi a zaben, manya-manyan wadanda ke kan gaba akwai Peter Obi da kuma Atiku Abubakar na jam’iyyar PDP.

Yan Sanda Sun Yi Nasarar Kama Yan Damfara Ta Intanet jihar Rivers

A wani labarin, rundunar 'yan sanda a jihar Rivers sun yi nasarar kama wasu da ake zargin 'yan damfara ne.

'Yan damfarar yanar gizon an kama su ne a unguwar Cypo cikin karamar hukumar Etche dake jihar.

Asali: Legit.ng