Yan Majalisar Tarayya Uku Sun Sauya Sheƙa Zuwa APC a Jihar Imo
- 'Yan majalisar wakilan tarayya uku da dubannin magoya bayansu sun sauya sheka zuwa jam'iyyar APC a jihar Imo
- A wurin taron da aka shirya don tarbansu a Owerri, 'yan majalisun daga PDP da APGA sun sha alwashin goyon bayan gwamna Uzodinma
- Shugaban APC na jihar ya yaba da matakin da suka ɗauka kana ya miƙa musu tutar jam'iyya a wurin taron
Imo - Mambobin majalisar wakilan tarayya 3 da ke kan kujera a inuwar jam'iyyar PDP da APGA a jihar Imo, kudu maso gabashin Najeriya sun sauya sheka zuwa APC mai mulki.
Channels tv ta tattaro cewa 'yan majalisun sun sauya sheƙa zuwa jam'iyya mai mulki tare da magoya bayansu kusan mutane 2,000.
Asali: UGC
Yan majalisar wakilan tarayya da suka ɗauki wannan mataki sun ƙunshi Bede Eke, mai wakiltar mazaɓar Aboh Mbaise/Ngor Okpala, a inuwar PDP, da Emeka Nwawuba na APGA mai wakiltar Mbaitoli/Ikeduru.
Sai kuma ɗan majalisar wakilan tarayya mai wakiltar Owerri Municipal/Owerri North/Owerri West karkashin inuwar jam'iyyar PDP, kamar yadda Dailypost ta rahoto.
LURA: Shin kana son bamu labari da tattaunawa da marubutanmu? Tuntubemu a info@corp.legit.ng
Meyasa suka zabi komawa inuwar APC?
Fitattun mambobin majalisar sun tabbatar da shiga APC a hukumance a wurin taron da aka shirya na musamman a filin Ndubuisi Kanu Square, Owerri, babban birnin Imo ranar Talata.
Sun bayyana cewa nagarta da kwarewar shugabancii da nasarorin da gwamna Hope Uzodinma ya samu a shekaru uku da rabi da suka gabata ne suka ja hankalinsu zuwa APC.
Legit.ng Hausa ta fahimci cewa magoya bayan 'yan majalisun uku sun jawo wasu mambobin sauran jam'iyyun siyasa a jihar Imo.
Kun yi abinda ya dace - APC
A jawabin maraba, shugaban APC na jiha, Macdonald Ebere, ya ce matakin da suka ɗauka na shiga jam'iyyar mai mulki, "Shi ne mafi a'ala a gare su."
Bugu da ƙari, 'yan majalisun sun sha alwashin goyon bayan gwamna Uzodinma, wanda ke kokarin tazarce kan kujerarsa a zaben gwamna mai zuwa ranar 11 ga watan Nuwamba, 2023.
A wani labarin kuma Zulum Da Buni Ke Kan Gaba a Tseren Zama Shugaban Kungiyar Gwamnoni NGF
Gwamna Babagana Zulum na cikin gwamnonin APC da ka iya zama shugaban kungiyar gwamnoni Najeriya (NGF).
Ana ganin gwamnoni 2 na arewa ke sahun gaba a ɗarewa mukamin a zangon mulki na gaba.
Asali: Legit.ng
