Ministoci na Yin Murabus, Tinubu Ya Yi Muhimman Nade Nade a Gwamnatinsa
- Shugaban kasa Bola Ahmed Tinubu ya yi sababbin nade-nade a gwamnatinsa, inda ya zakulo mutane daga jihohi daban-daban
- Mai girma Bola Tinubu ya dauko tsohon sanata daga jihar Katsina ya ba shi mukamin shugaban hukumar yi wa kamfanoni rajista (CAC)
- Hakazalika Shugaba Tinubu ya nada kwamishinoni bakwai a hukumar kididdigar jama'a ta kasa watau NPC
Editan Legit Hausa Sharif Lawal yana da kwarewar shekaru wajen kawo rahotannin siyasa, al'amuran yau da kullum, tsegumi da nishadi
FCT, Abuja - Shugaban kasar Najeriya, Bola Ahmed Tinubu ya naɗa sabon shugaban hukumar yi wa kamfanoni rajista (CAC).
Shugaba Bola Tinubu ya nada Sanata Ibrahim Ida a matsayin sabon shugaban hukumar CAC.
Source: Facebook
Mai ba shugaban kasa shawara ta musamman kan harkokin yada labarai da dabaru, Bayo Onanuga, ya bayyana hakan a shafinsa na Facebook a ranar Litinin, 30 ga watan Maris 2026.
A cewar Onanuga, Shugaba Tinubu ya kuma zaɓi mutane bakwai don cike gurabun kwamishinoni da suka rage a hukumar kididdigar jama'a ta kasa (NPC).
Wanene sabon shugaban CAC?
Ibrahim Ida yana da digiri na biyu (MSc) a fannin banki da kuɗi daga jami'ar Ibadan (1983) da kuma digirin lauya (LLB) daga jami'ar Abuja (2003).
Kafin zaɓensa a majalisar dattawa a 2017 don wakiltar Katsina ta Tsakiya, ya yi aiki a matsayin kwamishinan kuɗi na jihar Katsina kuma babban sakatare a hukumar kula da ma'aikatan gwamnatin tarayya.
Tinubu ya nada kwamishinoni a NPC
A halin da ake ciki, mutane bakwai da aka zaɓa a matsayin Kwamishinonin Tarayya don wakiltar jihohinsu a Hukumar Ƙididdigar Jama'a ta Ƙasa su ne:
- Kolawole Oladipupo Alabi (Ekiti)
- Nasiru Mu’azu (Zamfara)
- Usman Abubakar Tuggar (Bauchi)
- Dr. Isaka Alada Yahaya (Kwara)
- Farfesa Sadiq Isah Radda (Katsina)
- Suleiman Umar (Jigawa)
- Hon. Chiso Abdullahi Dattijo (Sokoto)
Waɗannan naɗe-naɗe suna jiran tantancewar majalisar dokoki ta kasa domin amincewa da su.
Tinubu ya yi nade-nade
Shugaban ya kuma naɗa Dr. Yusuf Mohammed daga jihar Kano a matsayin shugaban kwalejin kimiyya da fasaha ta tarayya da ke Kaltungo a jihar Gombe.
Source: Facebook
Haka zalika, Shugaba Tinubu ya tabbatar da naɗin Bala Mohammed Bello a matsayin mai ba shi shawara na musamman kan tattalin arzikin siyasa.
Bala Mohammed Bello, wanda ɗan jihar Taraba ne, yana da digirin farko a fannin akanta da kuma digiri na biyu (MBA) daga jami'ar Ahmadu Bello da ke Zaria.
Kafin wannan naɗin, ya kasance mataimakin shugaban babban bankin Najeriya (CBN).
Ya kuma yi aiki a matsayin babban darakta a bankin kula da shigowa da fitar da kayayyaki na Najeriya (NEXIM) daga 2017 zuwa 2022.
Ministan Tinubu ya yi murabus
A wani labarin kuma, kun ji cewa daya daga cikin Ministocin da ke aiki a gwamnatin, Shugaba Bola Ahmed Tinubu, ya yi murabus.
Ministan harkokin wajen Najeriya, Ambasada Yusuf Tuggar, ya yi murabus daga mukaminsa a ranar Litinin, 30 ga watan Maris, 2026.
Rahotanni sun tabbatar da cewa Ambassada Yusuf Tuggar ya ajiye aiki ne domin ya shiga takarar kujerar gwamnan jihar Bauchi a babban zaɓe na 2027 da ake tunkara.
Asali: Legit.ng
