Uwargidan Tsohon Gwamnan Kaduna, Hadiza Nasir El Rufai Ta Rasu? An Ji Gaskiyar Batu

• Hadiza Isma El-Rufai ta karyata rahoton karya da ake yadawa na mutuwarta, inda ta yi barkwanci da cewa ita ba za ta taba mutuwa ba
• Wani shafin Facebook ne ya yada jita-jitar cewa matar tsohon gwamnan Kaduna ta rasu bayan gajeriyar rashin lafiya a ranar Juma'a
• Wannan na zuwa ne bayan Legit Hausa ta rahoto cewa matar yayan El-Rufai, Aunty Safiya Ali Rufai ta rasu a ranar karamar Sallah

Sani Hamza, kwararren edita ne a fannin nishadi, al'amuran yau da kullum da kuma siyasa. Sani yana da shekaru sama da biyar a aikin jarida

Abuja - Uwargidan tsohon gwamnan Kaduna, Hadiza Isma El-Rufai, ta fito fili ta ƙaryata wasu rahotanni da aka yaɗa a kafofin sada zumunta waɗanda ke iƙirarin cewa ta riga mu gidan gaskiya.

Labarin, wanda aka wallafa a ranar 21 ga Maris, 2026, ya yi iƙirarin cewa "Aunty Safiya Ali Rufai," mahaifiyar ɗan majalisa Bello El-Rufai, ta rasu bayan gajeriyar rashin lafiya.

Kara karanta wannan

'Yan ta'adda sun tashi bam a Neja, sun datse hanyar kasuwancin Najeriya da Benin

Ana zargin Hadiza El-Rufai ta rasu

Rahoton ƙaryar, wanda KICHE TV Africa ya wallafa a shafinsa na Facebook, ya yi iƙirarin cewa Mallam Nasir El-Rufai da iyalansa suna cikin makoki, har ma an fara tura saƙonni na ta'aziyya daga sassa daban-daban.

Labarin ya nuna cewa:

"Tsohon gwamnan Kaduna, Mallam Nasir El-Rufai na makokin mutuwar matarsa, Aunty Safiya Ali Rufai, wadda mahaifiya ce ga dan majalisar Kaduna ta Arewa, Mohammed Bello El-Rufai.

"Ta rasu ne a yau Juma'a, bayan fama da rashin lafiya, inda ta tafi ta bar 'yan uwa, abokai da masoya cikin tsananin bakin ciki."

To sai dai, Legit Hausa ta gano cewa Safiya Ali Rufai da aka yi ikirarin ta rasu, ba ita ce mahaifiyar Bello El-Rufai ba, kuma ita mahaifiyarsa, Hadiza Isma tana nan da ranta, wanda hakan ya sanya labarin ya jawo rudani.

"Ni ba zan taɓa mutuwa ba" - Hadiza

Kara karanta wannan

Rabon shinkafar Tinubu: Yadda ake 'bambance' Kudu da Arewa wajen tallafa wa mutane

Ana tsakiyar hakan, a ranar Litinin, 23 ga Maris, 2026, Hadiza Isma El-Rufai ta yi amfani da shafinta na X wajen mayar da martani ga waɗanda suka tuntuɓe ta game da wannan labari.

Cikin salon barkwanci da zolaya wanda aka san ta da shi, Hadiza ta ce:

"Ba ni ba ce o... Ni? Ni ba zan taɓa mutuwa ba. Allah zai yi mini gata na musamman a nawa lamarin."

Wannan martani ya sanya masoyanta da dama nishadi, inda suka nuna farin cikinsu na ganin tana cikin ƙoshin lafiya da kuma yanayin wasa da dariya.

Hakan ya ƙara jaddada yadda ya kamata mutane su riƙa tantance labarai kafin su yarda da su, musamman a wannan lokaci da yaɗa jita-jita game da rayuwar manyan mutane ya zama ruwan dare a intanet.

Hatsarin yaɗa labaran karya a soshiyal midiya

Masana harkokin sadarwa sun yi kira ga jama'a da su kiyaye da shafukan da ke yaɗa labarai ba tare da kwararan hujjoji ba.

Rahoton da KICHE TV Africa ya yaɗa ya jawo fargaba ga dangi da abokan arziki, lamarin da ya tilasta wa matar tsohon gwamnan fitowa fili domin kwantar da hankula.

Kara karanta wannan

"Yan ta'adda na amfani da bidiyon azabtarwa don firgita al’umma": Masani ya bayar da mafita

A halin yanzu, Hadiza El-Rufai tana nan cikin ƙoshin lafiya tana ci gaba da gudanar da harkokinta na yau da kullum.

Matar yayan El-Rufai ta rasu

A wani labari, mun ruwaito cewa, mutuwa ta ratsa iyalan tsohon gwamnan jihar Kaduna, Malam Nasir Ahmad El-Rufai.

Rahoton ya nuna cewa Allah ya yi wa matar yayan El-Rufai, Safiya Ali Rufai, rasuwa a ranar idin Sallah bayan ta yi jinyar rashin lafiya.

'Dan majalisar da ke wakiltar Kaduna ta Arewa a majalisar wakilai, Mohammed Bello El-Rufai wanda da ne ga Nasir El-Rufai, ya sanar da rashin da aka yi.

Wanda ya tantance Muhammad Malumfashi, babban edita a Legit.ng.

Asali: Legit.ng