Farfesa Mahmud Yakubu da Wasu 'Yan Arewa 14 da Tinubu Ya Nada Jakadun Najeriya
- Shugaba Bola Tinubu ya sanya sunayen mutane 15 daga Arewa cikin sababbin jakadun da ya tura majalisar dattawa
- Sababbi jakadun daga Arewa sun fito daga jihohi daban-daban: Adamawa, Katsina, Borno, Kebbi, Jigawa, Plateau da Niger
- Ana sa ran za a tura sababbin wadanda aka nada zuwa kasashen da Najeriya ke da kyakkyawar alakar da ke tsakaninsu
Abuja - Shugaba Bola Ahmed Tinubu ya aika jerin sunayen mutanen da ya zaɓa don zama jakadun Najeriya zuwa ƙasashen waje.
Daga cikin sunaye mutane 35 da Tinubu ya aike wa majalisar, an gano cewa mutane 15 sun fito ne daga Arewacin Najeriya.
Source: Facebook
Tinubu ya nada sababbin jakadun Najeriya
Wata sanarwa da aka wallafa a shafin gwamnatin tarayya na intanet ya nuna cewa, Tinubu ya aika wa majalisar sunayen ne a wasiku daban daban.
Ana sa ran za a tura sababbin wadanda aka nada zuwa kasashen da Najeriya ke da kyakkyawar alakar da ke tsakaninsu, kamar China, Indiya, Koriya ta Kudu, da Kanada.
Sauran kasashen sun hada da Mexico, Hadaddiyar Daular Larabawa, Qatar, Afirka ta Kudu, Kenya, da kuma jakadun Majalisar Dinkin Duniya, UNESCO, da Tarayyar Afirka.
A makon da ya gabata ne dai shugaba Tinubu ya aika da sunayen jakadu uku domin tantancewa da tabbatar da su, kamar yadda muka ruwaito.
Wadanda aka nada sun hada da Ambasada Ayodele Oke (Oyo), Ambasada Amin Mohammed Dalhatu (Jigawa), da Kanar Lateef Kayode Are (mai ritaya daga Ogun).
'Yan Arewa 15 a jerin sababbin jakadun Najeriya
1. Ambassador Amin Mohammed Dalhatu — Jigawa
2. Yakubu Nyaku Danladi — Taraba
3. Miamuna Ibrahim Besto — Adamawa
4. Musa Musa Abubakar — Kebbi
5. Hamza Mohammed Salau — Niger
6. Ambassador Shehu Barde — Katsina
7. Ambassador Ahmed Mohammed Monguno — Borno
8. Ambassador Muhammad Saidu Dahiru — Kaduna
9. Ambassador Olatunji Ahmed Sulu Gambari — Kwara
10. Mahmud Yakubu — Bauchi
11. Tasiu Musa Maigari — Katsina
12. Yakubu N. Gambo — Plateau
13. Professor Nora Ladi Daduut — Plateau
14. Grace Bent — Adamawa
15. Ambassador Paul Oga Adikwu — Benue
Yadda aka rarraba matsayin sababbin jakadun Najeriya
Source: Twitter
Jaridar Punch ta rahoto cewa, Tinubu ya bukaci majalisar da ta tantance tare da tabbatar da mutane 15 da aka nada a matsayin jakadun aiki da kuma mutane 17 a matsayin jakadun da ba na aiki ba.
Akwai mata hudu a cikin jerin jakadun aiki da kuma mata shida a cikin jerin jakadun da ba na aiki ba.
- Jakadun da ba na aiki ba
Daga cikin wadanda ba jakadan aiki ba akwai Barista Ogbonnaya Kalu daga Abia, Reno Omokri (Delta), Mahmud Yakubu, Erelu Angela Adebayo, Ifeanyi Ugwuanyi.
Sauran sun hada da Tasiu Musa Maigari, Yakubu N. Gambo, Farfesa Nora Ladi Daduut, Otunba Femi Pedro, Cif Femi Fani-Kayode, da Barista Nkechi Linda Ufochukwu
A cikin jerin sunayen akwai Fatima Florence Ajimobi, Lola Akande, Grace Bent, Victor Okezie Ikpeazu, Sanata Jimoh Ibrahim da kuma Ambasada Paul Oga Adikwu.
- Jakadun aiki
Daga cikin wadanda aka zaba a matsayin jakadan aiki da kuma babban kwamishina mai suna: Enebechi Monica Okwuchukwu (Abia), Yakubu Nyaku Danladi (Taraba), Miamuna Ibrahim Besto (Adamawa), Musa Musa Abubakar (Kebbi), Syndoph Paebi Endoni (Bayelsa), Chima Geoffrey Lioma David (Ebonyi) da Mopelola Adeola-Ibrahim (Ogun).
Sauran wadanda aka nada sun hada da Abimbola Samuel Reuben (Ondo), Yvonne Ehinosen Odumah (Edo), Hamza Mohammed Salau (Niger), Ambasada Shehu Barde (Katsina), Ambasada Ahmed Mohammed Monguno (Borno), Ambasada Muhammad Saidu Dahiru (Kaduna), Ambasada Olatunji Ahmed Sulu Gambari (Kwara) da Ambasada Wahab Adekola Akande (Osun).
Farfesa Yakubu ya sauka daga shugaban INEC
A wani labarin, mun ruwaito cewa, Farfesa Mahmood Yakubu ya sauka daga matsayin shugaban hukumar zabe ta kasa watau INEC.
Farfesa Yakubu ya mika ragamar shugabancin hukumar ga May Agbamuche, wacce za ta rike INEC kafin nadin sabon shugaba
Tun a shekarar 2015, marigayi tsohon shugaban kasa, Muhammadu Buhari ya nada Mahmood Yakubu a matsayin shugaban INEC na kasa.
Asali: Legit.ng
