Yanayin da 'Yan Najeriya Suka Shiga yayin da Farashin Kayan Abinci Ya Sauka

• Faduwar farashin kayan abinci a fadin Najeriya ya kawo sauƙin rayuwa ga iyalai da ke fama da matsin tattalin arziki
• Rahotanni sun nuna cewa farashin kayan abinci ya ragu da kusan kashi 30 saboda wasu matakai da gwamnati ta dauka
• Masu sayayya da iyalai da dama sun bayyana farin ciki da fatan farashin kayan abinci zai ci gaba da raguwa a kasar

Editan Legit Hausa Ibrahim Yusuf yana da gogewar aikin jarida da rubuce-rubucen adabi sama da shekaru hudu, kuma kwararre ne a kawo rahotannin kasuwanci, siyasa da lamuran yau da kullum.

FCT, Abuja - Rahoto ya nuna cewa farashin kayan abinci a Najeriya ya ragu sosai a watannin da suka gabata.

Lamarin ya kawo sauƙin rayuwa ga mutane da dama bayan dogon lokaci na fama da hauhawar farashi.

Binciken jaridar Business Day a manyan birane ya nuna cewa farashin kayan masarufi ya sauka da kusan kashi 30 idan aka kwatanta da bara.

Kara karanta wannan

Sauki ya samu: Farashin shigo da man fetur a Najeriya ya ragu zuwa kasa da N830

Yadda farashi ya sauka a Najeriya

A birnin Legas, rahoto ya nuna cewa buhun shinkafar gida mai nauyin kilo 50 ta gida ta dawo N65,000, daga N73,000 a watan Oktoba 2024, an samu ragin kashi 11.

A daya bangaren kuma, shinkafar waje ta sauka daga N82,000 zuwa N62,000, raguwar da ta kai kashi 24.

A bangaren kayan gwari, farashin kwandon tumatir ya ragu daga N50,000 zuwa N35,000, raguwar kashi 30.

A Abuja kuwa, buhun shinkafar gida da ake sayarwa N75,000 a bara , yanzu ya koma N63,000, an samu saukin kashi 16.

A kasuwar Abuja, ƙaramar kwandon shinkafa (mudu) yanzu ya koma N2,500 daga N5,000 da ake sayarwa a baya.

Martanin 'yan Najeriya kan saukar farashi

Wata ma’aikaciyar lafiya a Legas, Ogechi Chimereme ta bayyana farin cikinta da wannan sauyi, tana cewa:

“Na je kasuwa kwanan nan, sai na ji daɗi da yanayin farashi. Na saye kaya fiye da yadda na tsara saboda sun yi sauƙi.”

Kara karanta wannan

Shugaban jami'a a Abuja ya bayyanawa matasa hanyoyin magance talauci

Ta ce kafin wannan sauƙin, ta kan ƙara kasafin abincin gidanta saboda tsadar kayan masarufi a kasuwanni.

Wata mai sayar da kayan marmari a Berger, Legas, mai suna Esther Ejiro, ta bayyana fatan cewa farashin kayan abinci zai ci gaba da raguwa.

“Na yi matuƙar farin ciki. Ina fatan wannan yanayi zai dore,”

- Inji ta

Dalilin saukar farashin kaya a Najeriya

Rahotanni sun nuna cewa a shekarar 2024, Najeriya ta fuskanci tsadar abinci mai tsanani, inda hauhawar farashin abinci ta kai kashi 40.87 a watan Yuni.

Amma a watan Satumba 2025, Daily Trust ta kawo rahotanni daga hukumar kididdiga da suka nuna cewa hauhawar farashin abinci ya ragu sosai.

Kamfanin binciken zuba jari na Cardinal Stone ya bayyana cewa raguwar hauhawar farashi ya samo asali ne daga faduwar farashin abinci da kuma ingantuwar tsaro.

Majalisa na son rage shigo da shinkafa

A wani rahoton, kun ji cewa majalisar dattawa ta fara muhawara kan neman rage shigo da shinkafa Najeriya.

Wasu 'yan majalisa sun bayyana cewa matakin zai taimaka wajen kara tsaron abinci da habaka tattalin arzikin Najeriya.

Kara karanta wannan

Yan bindiga sun sace masu ibada 20, sun hallaka malamin addini a Kaduna

Kungiyoyin masu casar shinkafa a Najeriya sun yaba da yunkurin da majalisar ta fara domin a cewarsu, hakan zai kawo cigaba.

Wanda ya tantance Muhammad Malumfashi, babban edita a Legit.ng.

Asali: Legit.ng