Lambar Abba Kabir Ta Fito, Malamin Addini Ya Jero Gwamnoni 4 da Ka Iya Komawa APC

• Babban malamin addinin Kirista, Elijah Ayodele ya yi hasashe mai ban mamaki game da wasu gwamnonin adawa da za su iya komawa APC
• Malamin ya gargadi ga Bola Tinubu cewa wasu gwamnonin adawa za su koma APC amma ba duka ne ke son taimaka masa
• Limamin ya ce wasu daga cikinsu za su shiga jam’iyyar ne kawai don su sami albarkar shugaban ƙasa da kuma neman mukamai

Abdullahi Abubakar, Editan Legit Hausa ne ta bangaren siyasa, kasuwanci da al'amuran yau da kullum, ya na da gogewar aikin jarida sama da shekaru biyar.

Abuja - Shugaban cocin INRI Evangelical Spiritual Church, Fasto Elijah Ayodele, ya yi hasashen wasu gwamnoni da ka iya komawa APC.

Faston ya yi gargadi ga Shugaba Bola Tinubu cewa wasu daga cikin gwamnonin ba don Allah za su shiga APC ba sai don cimma burinsu.

Fasto ya yi hasashen gwamnoni da za su shiga APC

Kara karanta wannan

'Ka ba mu dama': Mutanen Sokoto sun tura sako ga Tinubu kan harin ƴan bindiga

Hakan na cikin wata sanarwa da Tribune ta samu wanda mai taimaka masa, Osho Oluwatosin, ya fitar a yau Lahadi 5 ga watan Octoban 2025.

Ayodele ya ce gwamnonin jam’iyyun adawa za su koma APC nan ba da jimawa ba, amma ba duka za su goyi bayan sa ba.

Ya ce Tinubu ya zama mai taka-tsantsan saboda wasu daga cikin waɗanda za su koma jam’iyyar ba su da niyyar taimaka masa, maimakon haka, za su zama abokan gaba a cikin jam’iyyar.

Ya bayyana cewa gwamnonin Taraba, Zamfara, Enugu da Kano ne daga cikin waɗanda ke shirye-shiryen komawa APC.

Gargadin Fasto ga Tinubu kan gwamnonin

Sai dai, kamar yadda ya ce, wasu daga cikinsu na da niyyar taimaka wa shugaban ƙasa, amma wasu kuma za su shiga ne domin cimma muradunsu na siyasa.

“Kimanin gwamnonin adawa hudu za su koma APC — Taraba, Kano, Zamfara da Enugu. Amma ba duka za su tsaya kan yarjejeniyar tallafa wa shugaban ƙasa ba."

- Primate Ayodele.

Limamin ya kara da cewa wasu daga cikinsu za su koma jam’iyyar ne kawai don su sami albarkar Shugaban Ƙasa ko kuma su tabbatar da matsayinsu a siyasar jihohinsu.

Kara karanta wannan

Triumph: An shawarci Abba game da kalaman mataimakinsa, Sagagi kan zargin taba annabi

Ya kara da cewa:

“Wasu za su shiga ne kawai don su samu goyon bayan shugaban ƙasa — don haka batun wanda zai zama wane a 2027 zai zama mai zafi sosai."

Ayodele ya kuma shawarci Tinubu da ya binciki waɗannan sababbin mambobin jam’iyya da kansa domin gano waɗanda ke da muguwar niyya a ciki, ya ce akwai ‘yan APC da ma ba su ke fatan shugaban ƙasa ya yi nasara ba.

“Ba kowa cikin jam’iyyar zai taimaka wa shugaban ƙasa ba. Wasu makiya ne a cikin gida. Ya kamata ya gane su da wuri."

- Elijah Ayodele.

An roki gwamnan Taraba ya koma APC

Kun ji cewa wata ƙungiyar matasa ta shawarci Gwamna Agbu Kefas na jihar Taraba ya koma jam'iyyar APC mai mulkin Najeriya.

Kungiyar mai suna 'Concerned Taraba Youth Group' ta bukaci Gwamna Kefas ya haɗa kai da Bola Tinubu domin samun ayyukan more rayuwa.

Ta ce hakan zai taimaka wajen farfado da manyan ayyukan gwamnati kamar aikin wuta na Mambilla da sauransu.

Asali: Legit.ng