Ministan Tinubu Ya ba da Mamaki, Ya Ce Ya Shirya Shiga Zanga Zangar Matasa a Najeriya

• Ministan matasa na kasa, Kwamared Ayodele Olawande ya ce rashin lokaci ke hana shi shiga zanga-zangar matasa a Najeriya
• Kwamared Olawande ya gargaɗi matasa da su guje wa tayar da tarzoma ko lalata kayan gwamnati yayin zanga-zangar da suke yi
• Ya ce gwamnatin tarayya ba za ta hana jama'a yin zanga-zanga ba amma kuma a shirye take da saurari kokensu cikin lamana

Ahmad Yusuf, kwararren edita ne a Legit Hausa da ya shafe tsawon shekaru yana kawo muku rahotannin siyasa, nishadi da al'amuran yau da kullum

FCT Abuja - Ministan harkokin matasa na Najeriya, Kwamared Ayodele Olawande ya ce rashin lokaci ya hana shi shiga zanga-zangar da matasa ke yi a Najeriya.

Ministan ya bayyana cewa da yana da isasshen lokaci, zai shiga cikin matasa masu zanga-zangar da aka fara yau Litinin ƙarƙashin kungiyar Take It Back.

Kwamared Olawande ya faɗi haka ne da yake zantawa da manema labarai a wurin taron shekara-shekara na matasa masu yi wa kasa hidima watau NYSC a Abuja, rahoton Daily Trust.

Kara karanta wannan

Tirkashi: Matasa sun bijirewa ƴan sanda, sun mamaye titunan Abuja da wasu jihohi

Ministan ya bukaci matasan Najeriya su fito su bayyana abin da ke ransu amma ya gargaɗe su da su guji lalata kayayyakin gwamnati da sunan zanga-zanga.

Matasa sun fara zanga-zanga a Najeriya

Wannan kalamai na Kwamared Ayodele Olawande na zuwa ne a daidai lokacin da zanga-zanga ta ɓarke a Abuja, Legas da wasu jihohi yau Litinin, 7 ga watan Afrilu.

Zanga-zangar da ƙungiyar 'Take It Back' ta shirya na ci gaba da gudana duk da gargaɗin da rundunar ‘yan sanda ta yi a kan gangamin.

Tun farko dai rundunar ‘yan sanda ta ce ba ta yarda da zanga-zangar ba, kasancewar an shirya ta a ranar da gwamnati ta ware don bikin 'Ranar ‘Yan Sanda ta Ƙasa'.

Minista ya ce zai shiga iya zanga-zanga

Da yake hira da ƴan jarida kan lamarin, Ministan ya ce matasa na da 'yancin bayyana ra’ayoyinsu, sai dai ya ja kunnen su cewa kada su tayar da zaune tsaye ko lalata kayayyakin gwamnati.

Kara karanta wannan

Matasa sun rikita Abuja da zanga zanga, an fara harba barkonon tsohuwa

“Duk wanda ke da damuwa kan halin da ake ciki yana da 'yancin yin zanga-zanga. Da zan samu lokaci, da na je na halarci wannan zanga-zangar,” in ji shi.

Ya ce babu gwamnatin da za ta hana mutane yin zanga-zanga, kuma za a saurari koke-koken su.

Wane gargaɗi ministan ya yi wa matasa?

Duk da haka, ya gargaɗi matasa da su kauce wa tashin hankali da lalata kadarorin gwamnati, musamman waɗanda lalacewarsu za ta shafi tattalin arzikin ƙasa.

“Ina tare da su, kuma zan je in yi magana da su idan na samu lokaci,” in ji Olawande.

Ya ƙara da cewa gwamnati a shirye take ta saurari muradun matasa tare da neman mafita cikin lumana.

Abin da ƴan sanda suka yi wa masu zanga-zanga

A wani labarin, kun ji cewa ƙungiyar kare haƙƙin ɗan adam ta duniya watau Amnesty Int'l, ta koka kan yadda jami'an tsaro ke farmakar masu zanga-zanga.

Kara karanta wannan

'Ba ni ba neman sanata': Gwamna ya ce yana gama wa'adinsa zai yi ritaya a siyasa

Ƙungiyar ta bayyana matuƙar damuwa da yadda jami’an tsaro ke cin zarafin masu zanga-zanga a Abuja da Fatakwal, babban birnin jihar Ribas.

Ta ce a Fakwal, ƴan sanda sun rika dukan masu zanga-zanga da ƴan jarida, sannan kuma sun fesa masu barkono mai sa hawaye.

Wanda ya tantance Muhammad Malumfashi, babban edita a Legit.ng.

Asali: Legit.ng