Malamin Musulunci Ya Fanɗarewa Sarkin Musulmi, Ya Fadi Ranar Sallar Idi a Najeriya

• Sheikh Muhammed Habibullah Adam Abdullah El-Ilory ya bayyana Litinin, 31 ga Maris, 2025, a matsayin ranar Eid-el-Fitr a Najeriya, bisa ga ka’idojin ilimi da addini
• Malamin ya ce ba za a iya ganin sabon jinjirin wata ba a ranar 29 ga Maris, 2025, don haka 31 ga Maris ita ce ranar farko ta Shawwal
• Sheikh El-Ilory ya jaddada cewa ilimin taurari na zamani na iya hango lokaci da matsayin wata, kamar yadda ake hasashen faduwar rana da duniyar rana
• Ya bukaci Musulmai su hada ilimi da koyarwar addini wajen tantance ranar Sallah, tare da mika fatan alheri ga jagororin Musulunci a Najeriya

Abdullahi Abubakar, Editan Legit Hausa ne ta bangaren siyasa, kasuwanci da al'amuran yau da kullum, ya na da gogewar aikin jarida sama da shekaru biyar.

Agege, Lagos - Sheikh Muhammed Habibullah Adam Abdullah El-Ilory ya fadi ranar da za a sallar Idi a Najeriya.

Kara karanta wannan

Hafsan tsaro ya tsoma baki kan kisan ƴan Arewa a Edo, ya fadi shirinsu kan lamarin

Shehin malamin ya bayyana Litinin, 31 ga Maris, 2025, a matsayin ranar Eid-el-Fitr ga Musulmin Najeriya, bisa ka'idojin kimiyya da addini.

Sallah: Malami ya saba da Sarkin Musulmi

Hakan na kunshe ne a cikin wata sanarwa da mai magana da yawunsa, Nurudeen Ibrahim, ya wallafa a shafin Facebook.

Sheikh El-Ilory ya bayyana cewa kimiyyar taurari na zamani na iya tantance bayyanar sabon wata.

Malamin ya bayyana cewa:

"Da taimakon fasahar zamani, ana iya sanin lokaci da wuri na bayyanar wata, kamar yadda ake hasashen fitowar rana da duniyar rana."

Ya ce a ranar 29 ga Maris, 2025, shekarun sabon wata a Najeriya zai kasance awanni 6 da mintuna 59, wanda ba zai ba da damar ganin jinjirin da ido ba.

Haka nan, a Saudiyya, shekarun jinjirin zai kasance awanni 4 da mintuna 40, wanda hakan na nufin ba za a iya ganinsa da ido ba.

Kara karanta wannan

Bayan Saudiyya, Sarkin Musulmi ya sanar da ranar karamar Sallah a Najeriya

Ya kara da cewa:

"Samuwar hoton da manhajojin CCD ke samarwa ba ya cikin Sunnah na Manzon Allah (SAW), kamar yadda koyarwar addini ta bayyana."

"Litinin, 31 ga Maris, ita ce 1 ga Shawwal, kuma ranar Eid-el-Fitr bisa ga koyarwar Annabi da kimiyyar zamani."

"Allah ya kawo mana zaman lafiya da albarka a wannan bikin Eid-el-Fitr."

Malami ya shawarci Musulmi kan haɗin kai

Sheikh El-Ilory ya bukaci Musulmai su hada ilimi da addini don gujewa rudani kan ranar Sallah a Najeriya.

Ya mika fatan alheri ga jagororin Musulunci a Najeriya, ciki har da Mai Martaba Sultan, Alhaji Muhammad Sa’ad Abubakar.

Har ila yau, malamin ya yi addu'ar gudanar da bukukuwan sallah cikin aminci da walwala a Najeriya ba tare da tsaiko ba.

Sarkin Musulmi ya sanar da ganin wata

A baya, mun ba ku labarin cewa Mai alfarma Sarkin Musulmi, Alhaji Muhammad Sa'ad Abubakar ya fitar da sanarwa kan ganin watan Shawwal a Najeriya.

Kara karanta wannan

Rai baƙon duniya: Musulunci ya yi rashi bayan sanar da rasuwar malami a watan azumi

Alhaji Muhammad Sa'ad Abubakar ya bayyana an samu rahotannin ganin watan Shawwal 1446AH a sassa daban-daban na Najeriya.

Sultan ya bayyana cewa yau Lahadi, 30 ga watan Maris 2025, ita ce daidai da 1 ga watan Shawwal 1446AH.

Wanda ya tantance Muhammad Malumfashi, babban edita a Legit.ng.

Asali: Legit.ng